Vazirlar Mahkamasi huzuridagi O'zbekiston texnik jihatdan tartibga solish agentligi

✅ Texnik tartibga solish agentligi direktori Akmal Jumanazarov tomonidan Qoraqalpog‘iston Respublikasida turli mahsulotlarni ishlab chiqaruvchi sanoat korxonalari faoliyati va ularning ishlab chiqarish jarayonlari joyiga chiqqan holda atroflicha o‘rganildi. Tashrif davomida hududning sanoat salohiyatini oshirish hamda mahalliy mahsulotlarning sifati va raqobatbardoshligini ta’minlash masalalariga alohida e’tibor qaratildi.
 

Muloqotda “Nukus Med Tex” MChJ, “Karakalpak Basaltwool” MChJ, “COALS KS” MChJ, “NUKUS SSP TEXNOPARK” MChJ, “Surxon Taxiatash Textile” MChJ, “Lanko Miya” MChJ, “Nukus Dilisha” MChJ va “Biogumus” F/X kabi yetakchi korxonalar rahbarlari hamda vakillari ishtirok etishdi.

Muloqot davomida farmatsevtika, bazalt, gazoblok, charm-poyabzal, ip-kalava, tekstil, qizilmiya ildizi ekstrakti va qishloq xo‘jaligi mahsulotlarini AQSh hamda Yevropa davlatlariga eksport qilish, eksport geografiyasini kengaytirish, korxonalarga xalqaro standartlarni joriy etish va metrologik xizmatlar ko‘rsatish masalalari muhokama qilinib, har bir tadbirkorning takliflari tinglandi.

Tadbirkorlar bilan kechgan muloqotda korxonalarning mavjud laboratoriyalari salohiyatidan samarali foydalanish, ushbu laboratoriyalarni rivojlantirish va ularni malakaliligini ma’qullashdan o‘tkazish masalalariga to‘xtalib o‘tildi. Shuningdek, mahsulotlarni xalqaro standartlar talablariga muvofiq sinovlardan o‘tkazish hamda ishlab chiqarish jarayonlariga zamonaviy xalqaro standartlarni keng joriy etish bo‘yicha o‘zaro hamkorlik istiqbollari ko‘rib chiqildi.

✅ O‘rganishlar davomida ishlab chiqarilayotgan mahsulotlar sifatini oshirish, ularning ichki va tashqi bozorlardagi raqobatbardoshligini ta’minlash hamda ishonchlilik va sifat ko‘rsatkichlarini yaxshilash yuzasidan zarur tavsiyalar berildi. Ishlab chiqarishni xalqaro talablar asosida yo‘lga qo‘yish va ushbu yo‘nalishda davlat tomonidan taqdim etilayotgan imtiyoz va yengilliklardan samarali foydalanish zarurligi ta’kidlandi.

✅ Shu bilan birga, ishtirokchilarga O‘zbekiston Respublikasi Prezidentining 2026-yil 16-fevraldagi PF–25-son Farmoni asosida tadbirkorlik subyektlari uchun yaratilgan yangi imkoniyat va imtiyozlar haqida batafsil ma’lumot berildi. Texnik jihatdan tartibga solish sohasida amalga oshirilayotgan islohotlar, standartlashtirish hamda metrologiya yo‘nalishlarida ko‘rsatilayotgan xizmatlarning amaliy ahamiyati tushuntirib o‘tildi.

✅ Uchrashuv yakunida tomonlar xalqaro standartlarni amaliyotga keng joriy etish va ko‘tarilgan masalalarda Agentlik vakolati doirasida har tomonlama amaliy yordam ko‘rsatishga kelishib oldilar. Shuningdek, mahsulotlar sifatini izchil ta’minlash hamda korxona xodimlarining malakasini oshirish yo‘nalishlarida o‘zaro hamkorlikni yanada rivojlantirish bo‘yicha muhim kelishuvlarga erishildi.