To‘qimachilik mahsulotlarini tashqi bozorlarga chiqarishda xalqaro talablar muhokama qilindi
2026-09-11 11:00:00 / Yangiliklar

🫥 Texnik jihatdan tartibga solish agentligi huzurida tashkil etilgan Texnik jihatdan tartibga solish sohasida tadbirkorlarni qo‘llab-quvvatlash klubi doirasida to‘qimachilik mahsulotlarini ishlab chiqaruvchi tadbirkorlik subyektlari ishtirokida ochiq muloqot o‘tkazildi. Tadbir Texnik jihatdan tartibga solish agentligi hamda Yengil sanoatni rivojlantirish agentligi hamkorligida tashkil etildi.
Muloqotda mahalliy to‘qimachilik korxonalarining eksport salohiyatini oshirish, tashqi bozorlarga chiqishdagi texnik to‘siqlarni bartaraf etish, xalqaro standartlarni joriy qilish va mahsulotlarning raqobatbardoshligini ta’minlash masalalari muhokama qilindi. 2025-yil yakuniga ko‘ra, O‘zbekiston to‘qimachilik mahsulotlari eksporti 2,6 mlrd AQSh dollariga yetgan va mahsulotlar 75 ta davlatga eksport qilingan. 2026-yilda esa ushbu ko‘rsatkichni 4 mlrd dollarga yetkazish maqsadi belgilangan.
Tadbirkorlarga tashqi bozorlarga chiqishda yagona universal sertifikat mavjud emasligi tushuntirildi. Har bir mamlakat va mahsulot turi bo‘yicha texnik reglamentlar, markirovka, mahsulot xavfsizligi, sinovlar, kimyoviy moddalarga qo‘yiladigan talablar hamda xaridorlarning qo‘shimcha shartlari farq qilishi mumkin. Shu bois eksportchi korxona maqsadli bozor talablarini oldindan aniqlab olishi muhimligi ta’kidlandi.
Yevropa Ittifoqi bozoriga chiqishda to‘qimachilik mahsulotlarining tola tarkibini to‘g‘ri ko‘rsatish va belgilangan markirovka talablariga rioya qilish muhim hisoblanadi. AQSh bozorida ham mahsulotning tola tarkibi, ishlab chiqarilgan mamlakat, ishlab chiqaruvchi haqidagi ma’lumotlar hamda kiyim-kechak mahsulotlarini parvarishlash bo‘yicha ko‘rsatmalarga doir talablarga rioya etilishi zarurligi qayd etildi.
Shuningdek, xalqaro bozorlarda keng qo‘llaniladigan OEKO-TEX® STANDARD 100 va Global Organic Textile Standard (GOTS) kabi standartlarning maqsadi tushuntirildi. Bunda sertifikatni tanlashda uning ommalashgani emas, balki muayyan eksport bozori, mahsulot turi va xorijiy xaridor talablariga muvofiqligi asosiy mezon bo‘lishi lozimligi ta’kidlandi.
🫥 Mahsulotlarning tashqi bozor talablariga muvofiqligini baholashda laboratoriya sinovlari va metrologiya xizmatlarining ahamiyatiga ham alohida e’tibor qaratildi. Mahsulot tarkibi, fizik-mexanik xususiyatlari, rang barqarorligi, tola tarkibi va zararli moddalar bo‘yicha sinovlarni to‘g‘ri tashkil etish, shuningdek, ishlab chiqarishda o‘lchash vositalarining aniqligi va ishonchliligini ta’minlash bo‘yicha tavsiyalar berildi.
🫥 Ochiq muloqot yakunida tadbirkorlarning sertifikatlashtirish, laboratoriya sinovlari, markirovka, xalqaro standartlarni joriy etish va eksportdagi texnik to‘siqlar bilan bog‘liq savollariga mutaxassislar tomonidan javoblar berildi.
🫥 Ta’kidlanganidek, asosiy maqsad faqat sertifikat olish emas, balki xalqaro talablarga javob beradigan, sifatli va raqobatbardosh eksportbop mahsulot ishlab chiqarishdir.






