O‘zbekiston va Ruminiya: texnik tartibga solish sohasidagi hamkorlik yangi bosqichda
2026-09-09 11:00:00 / Yangiliklar
O‘zbekiston Texnik jihatdan tartibga solish agentligi direktori Akmal Jumanazarov Ruminiyaning O‘zbekistondagi Favqulodda va Muxtor Elchisi Daniel Kristian Chobanu bilan uchrashdi.
Muloqot davomida ikki mamlakat o‘rtasida savdodagi texnik to‘siqlarni bartaraf etish, standartlashtirish, metrologiya, muvofiqlikni baholash, sertifikatlashtirish, bozor nazorati hamda mahsulotlar xavfsizligini ta’minlash yo‘nalishlarida hamkorlikni kengaytirish masalalari muhokama qilindi.
Ta’kidlanganidek, O‘zbekiston va Ruminiya o‘rtasidagi savdo-iqtisodiy aloqalar izchil rivojlanib bormoqda. 2025-yilda ikki mamlakat o‘rtasidagi o‘zaro tovar ayirboshlash hajmi 90,6 mln dollarni tashkil etgan.
Uchrashuvda texnik jihatdan tartibga solish sohasida kadrlar tayyorlash va mutaxassislar malakasini oshirish, tajriba almashish, zamonaviy laboratoriyalarni rivojlantirish, mahsulotlar xavfsizligini baholash hamda bozor nazorati mexanizmlarini takomillashtirish masalalariga alohida e’tibor qaratildi.
Shuningdek, O‘zbekiston to‘qimachilik va tikuv-trikotaj mahsulotlarining Yevropa bozorlariga eksportini kengaytirish uchun texnik talablar va muvofiqlikni baholash tizimlari bo‘yicha hamkorlikni kuchaytirish muhimligi qayd etildi.
Muloqot yakunida Yevropa texnik ko‘mak dasturlari doirasida yangi qo‘shma loyihalarni amalga oshirish, ilg‘or Yevropa tajribasini joriy etish hamda texnik jihatdan tartibga solish sohasidagi hamkorlikni amaliy loyihalar bilan boyitish bo‘yicha istiqbolli yo‘nalishlar belgilab olindi.