Texnik jihatdan tartibga solish sohasida O‘zbekiston–Turkiya hamkorligi kengaymoqda
2026-09-08 11:00:00 / Yangiliklar
O‘zbekiston Texnik jihatdan tartibga solish agentligi direktori Akmal Jumanazarov Turkiya Respublikasining O‘zbekistondagi Favqulodda va Muxtor Elchisi Ufuk Ulutash bilan uchrashuv o‘tkazdi.
Unda O‘zbekiston–Turkiya munosabatlarining texnik jihatdan tartibga solish, standartlashtirish, metrologiya va muvofiqlikni baholash sohalaridagi joriy holati hamda 2026–2027-yillarga mo‘ljallangan ustuvor vazifalar muhokama qilindi.
Muloqot davomida so‘nggi yillarda ikki mamlakat o‘rtasida mazkur yo‘nalishlarda amaliy hamkorlik izchil rivojlanib borayotgani ta’kidlandi.
2024–2025-yillarda Turkiya Sanoat va texnologiyalar vazirligi bilan Hamkorlik to‘g‘risidagi bitim, Turkiya Savdo vazirligi bilan mahsulot xavfsizligi va infratuzilmasi bo‘yicha hamkorlik bayonnomasi imzolangan. Shuningdek, Turk standartlari instituti (TSE) hamda Turkiya Akkreditatsiya agentligi (TÜRKAK) bilan hamkorlik dasturlari yo‘lga qo‘yilgan.
Uchrashuvda savdodagi texnik to‘siqlarni bartaraf etish, mahsulot xavfsizligini ta’minlash, bozor nazoratini takomillashtirish, shuningdek, kvant metrologiyasi va ilmiy hamkorlikni rivojlantirish masalalariga alohida e’tibor qaratildi. TIKA grantlari doirasida qo‘shma loyihalarni amalga oshirish, malakali kadrlar tayyorlash hamda laboratoriyalarni zamonaviy sinov uskunalari bilan ta’minlash istiqbollari ham muhokama qilindi.
Ta’kidlanganidek, 2025-yil yakunlariga ko‘ra, O‘zbekiston va Turkiya o‘rtasidagi o‘zaro tovar ayirboshlash hajmi 3,1 milliard AQSh dollarini tashkil etgan. Oliy darajadagi Strategik hamkorlik kengashining 2026-yil 29-yanvardagi to‘rtinchi yig‘ilishida ushbu ko‘rsatkichni Imtiyozli savdo to‘g‘risidagi bitimdagi tovarlar ro‘yxatini kengaytirish orqali 5 milliard dollarga yetkazish vazifasi belgilangan.
Mazkur maqsadga erishishda standartlashtirish va texnik jihatdan tartibga solish sohasidagi hamkorlik muhim ahamiyat kasb etishi qayd etildi. Standartlarni uyg‘unlashtirish, muvofiqlikni baholash natijalarini o‘zaro tan olish hamda mahsulot xavfsizligini ta’minlash ikki tomonlama savdo-iqtisodiy aloqalarni yanada rivojlantirishga xizmat qiladi.
Uchrashuv yakunida tomonlar texnik jihatdan tartibga solish, standartlashtirish, metrologiya, akkreditatsiya va mahsulot xavfsizligi yo‘nalishlaridagi hamkorlikni yanada kengaytirish, mavjud kelishuvlar ijrosini ta’minlash hamda muhokama qilingan loyiha va tashabbuslarni amalga oshirishni jadallashtirish bo‘yicha amaliy choralarni davom ettirishga tayyor ekanliklarini bildirdilar.