Atom energetikasi sohasida texnik jihatdan tartibga solish masalalari muhokama qilindi
2026-09-02 10:00:00 / Yangiliklar
🔵 “O‘zatom” agentligi huzuridagi “Atom elektr stansiyasi qurilishi direksiyasi” davlat korxonasida Rossiya Federatsiyasining “Atomstroyeksport” va “NIKIMT-Atomstroy” tashkilotlari vakillari ishtirokida uchrashuv bo‘lib o‘tdi.
🔴 Unda O‘zbekiston Respublikasi Texnik jihatdan tartibga solish agentligi vakillari ham ishtirok etdi.
Muloqotda atom energetikasi sohasida amalga oshirilayotgan loyihalarni texnik jihatdan tartibga solish, standartlashtirish va metrologik ta’minot yo‘nalishlarida hamkorlikni rivojlantirish masalalari muhokama qilindi.
Xususan, atom energetikasi obyektlarini loyihalash, qurish va ekspluatatsiya qilish jarayonlarida standartlardan samarali foydalanish, o‘lchashlarning birliligini ta’minlash, metrologik ta’minotni takomillashtirish hamda xalqaro va ilg‘or xorijiy tajribani milliy amaliyotga joriy etish masalalari yuzasidan fikr almashildi.
🟢 Shuningdek, sohaning normativ-texnik bazasini takomillashtirish, zamonaviy yondashuvlarni joriy etish va mutaxassislarning kasbiy salohiyatini oshirish bo‘yicha hamkorlik yo‘nalishlari ko‘rib chiqildi.
🟤 Uchrashuv yakunida texnik jihatdan tartibga solish, standartlashtirish va metrologiya sohalarida o‘zaro manfaatli hamkorlikni kengaytirish, tajriba va bilim almashinuvini muntazam davom ettirish bo‘yicha kelishuvlarga erishildi.
🩷 Mazkur hamkorlik atom energetikasi sohasida sifat va xavfsizlikni ta’minlashga xizmat qiladigan zamonaviy standartlar, texnik talablar va metrologik yondashuvlarni joriy etishda muhim ahamiyat kasb etadi.