Turkiyaning notifikatsiya qilingan organlar tizimi bo‘yicha tajribasi o‘rganildi
2026-08-28 10:00:00 / Yangiliklar
2026-yil 25–26-avgust kunlari O‘zbekiston Respublikasi Vazirlar Mahkamasi, O‘zbekiston texnik jihatdan tartibga solish agentligi, O‘zbekiston akkreditatsiya markazi, «O‘zbek-Turk Test Markazi» qo‘shma korxonasi hamda UZINFOCOM vakillaridan iborat delegatsiya Anqara shahrida xizmat safarida bo‘ldi.
Safar «O‘zbek-Turk Test Markazi» qo‘shma korxonasi va Turkiya Standartlari Instituti (TSE) hamkorligida tashkil etildi. Dastur doirasida Turkiya Respublikasi Savdo vazirligining Mahsulot xavfsizligi va bozor nazorati bosh boshqarmasida Notified Body (Onaylanmış Kuruluş) tizimi bo‘yicha uchrashuv o‘tkazildi.
Uchrashuvda Turkiya Savdo vazirligi, Sanoat va texnologiyalar vazirligi, Turkiya akkreditatsiya agentligi (TÜRKAK) hamda TSE mutaxassislari ishtirok etdi.
Muloqot davomida Turkiyaning muvofiqlikni baholash organlarini akkreditatsiyadan o‘tkazish, ularning texnik kompetentligini baholash, vakolatli organ sifatida tayinlash va faoliyati ustidan davlat nazoratini amalga oshirish tajribasi o‘rganildi.
Shuningdek, Notified Body maqomini olish jarayoni, jumladan, TÜRKAKdan akkreditatsiyadan o‘tish, vakolatli organga ariza topshirish, belgilangan talablar asosida baholashdan o‘tish hamda Yevropa Komissiyasining NANDO axborot tizimida ro‘yxatdan o‘tish tartibi yuzasidan batafsil ma’lumot berildi.
Qayd etilganidek, hozirgi kunda Turkiyada 15 ta texnik reglament doirasida 74 ta notifikatsiya qilingan organ faoliyat yuritmoqda.
Uchrashuvda notifikatsiya qilingan organlarning mustaqilligi va xolisligini ta’minlash, manfaatlar to‘qnashuvining oldini olish, malakali kadrlar va zarur texnik resurslarga ega bo‘lish, shuningdek, baholash natijalarining ishonchliligini ta’minlash masalalariga alohida e’tibor qaratildi.
Turkiya tajribasini o‘rganish va samarali mexanizmlarni O‘zbekiston amaliyotiga moslashtirish milliy muvofiqlikni baholash tizimini xalqaro talablarga yanada yaqinlashtirish, texnik to‘siqlarni kamaytirish hamda mahalliy mahsulotlarning tashqi bozorlarda tan olinishiga ko‘maklashadi.