“O‘zbekiston Respublikasi mustaqilligining 35 yilligi” esdalik nishonlari tantanali topshirildi
2026-08-27 10:00:00 / Yangiliklar
O‘zbekiston Respublikasi mustaqilligining 35 yilligi munosabati bilan O‘zbekiston texnik jihatdan tartibga solish agentligida “O‘zbekiston Respublikasi mustaqilligining 35 yilligi” esdalik nishonlarini tantanali topshirishga bag‘ishlangan tadbir bo‘lib o‘tdi.
Tadbirda Agentlik direktori Akmal Jumanazarov so‘zga chiqib, jamoa a’zolari, soha vakillari hamda texnik jihatdan tartibga solish tizimi rivojiga ko‘p yillar davomida munosib hissa qo‘shib kelayotgan faxriylar va fidoyi ustozlarni Vatanimiz mustaqilligining 35 yilligi bilan samimiy muborakbod etdi.
Ta’kidlanganidek, mamlakatimizda texnik jihatdan tartibga solish tizimini takomillashtirish, mahsulotlarning sifati va xavfsizligini ta’minlash, milliy standartlashtirish tizimini rivojlantirish hamda xalqaro talablarga uyg‘unlashtirish borasida izchil ishlar amalga oshirilmoqda. Ushbu jarayonlarda soha mutaxassislarining bilim va tajribasi, mas’uliyatli mehnati va fidoyiligi muhim ahamiyat kasb etmoqda.
Tadbir davomida O‘zbekiston Respublikasi Prezidentining 2026-yil 25-iyundagi tegishli Farmoniga muvofiq ta’sis etilgan “O‘zbekiston Respublikasi mustaqilligining 35 yilligi” esdalik nishoni bilan Agentlik markaziy apparati hamda tizim tashkilotlarining soha rivojiga munosib hissa qo‘shib kelayotgan bir guruh xodimlari taqdirlandi.
Taqdirlanganlarga samimiy tabriklar bildirilib, mustahkam sog‘lik, oilaviy farovonlik, sharafli va mas’uliyatli faoliyatida yangi yutuq va muvaffaqiyatlar yor bo‘lishi istak bildirildi.
Tadbir yakunida Vatanimiz mustaqilligining 35 yilligi xalqimizning birdamligi, bunyodkorlik salohiyati va Yangi O‘zbekiston taraqqiyoti yo‘lida amalga oshirilayotgan keng ko‘lamli islohotlarning yorqin ifodasi ekani ta’kidlandi.