Mustaqillik bayrami arafasida Qashqadaryoda metrologik laboratoriya o‘z faoliyatini boshladi
2026-08-21 11:00:00 / Milliy qadriyatlar va bayramlar
✅ Mustaqilligimizning 35 yillik bayrami arafasida Qashqadaryo viloyatida zamonaviy metrologik infratuzilmani rivojlantirish, korxona va tadbirkorlik subyektlariga ko‘rsatilayotgan metrologik xizmatlarni yanada takomillashtirish va ularni hududlarga yaqinlashtirish borasida tizimli ishlar amalga oshirilmoqda.
✅ O‘zbekiston texnik jihatdan tartibga solish agentligi huzuridagi O‘zbekiston milliy metrologiya institutining Qashqadaryo filialida 6 ta zamonaviy laboratoriya — massa, bosim, fizika-kimyo, elektr, geometriya va hajm yo‘nalishlarida faoliyati yo‘lga qo‘yildi.
Laboratoriyalar Rossiya, Xitoy, AQSh va Yevropa davlatlaridan xarid qilingan 19 turdagi zamonaviy va yuqori aniqlikdagi o‘lchash vositalari bilan jihozlandi. Bu o‘lchash natijalarining aniqligi va ishonchliligini oshirish hamda xizmat ko‘rsatish muddatlarini qisqartirish imkonini beradi.
Ayni paytda filialda manometrlarni 70 bargacha kalibrlash, gaz analizatorlarini qiyoslash, hajm o‘lchash vositalarini kalibrlash, temperatura o‘lchash vositalarini 250 °C gacha hamda massa o‘lchash vositalarini qiyoslash xizmatlari ko‘rsatilmoqda.
Yangi laboratoriyalarning tashkil etilishi Qashqadaryodagi korxona va tashkilotlarni metrologik xizmatlar bilan hududning o‘zida qamrab olish imkoniyatlarini kengaytirib, vaqt va xarajatlarni tejashga xizmat qilmoqda.
✅ Aniq va ishonchli o‘lchashlar sanoat va ishlab chiqarish jarayonlarining barqarorligi, mahsulot sifati, mehnat xavfsizligi hamda korxonalar raqobatbardoshligini ta’minlashda muhim omil hisoblanadi.