O‘zbekiston delegatsiyasi Turkiyada mahsulotlarni raqamli kuzatish va nazorat qilish tizimlari bilan tanishdi
2026-08-19 11:00:00 / Yangiliklar
✅Texnik jihatdan tartibga solish agentligi direktori o‘rinbosari Timur Mashanpin boshchiligidagi O‘zbekiston delegatsiyasining Turkiya Respublikasiga amaliy tashrifi tashkil etildi. Tadbir “O‘zbek-Turk Test Markazi” qo‘shma korxonasi hamda Turkiya Standartlar Instituti (TSE) tashabbusi bilan o‘tkazildi.
✅ Delegatsiya tarkibidan Agentlik va uning tizim tashkilotlari, Qurilish va uy-joy kommunal xo‘jaligi vazirligi, soliq organlari, UZINFOCOM, Raqobatni rivojlantirish va iste’molchilar huquqlarini himoya qilish qo‘mitasi, Kiberxavfsizlik markazi hamda boshqa tashkilotlar mutaxassislari o‘rin oldi.
Tadbir doirasida Turkiyaning Darphane ve Damga Matbaası Genel Müdürlüğü faoliyati o‘rganilib, mahsulotlarni ishlab chiqarishdan yakuniy iste’molchigacha raqamli kuzatish, qalbakilashtirishning oldini olish va tovar aylanmasi shaffofligini ta’minlashga qaratilgan tizimlar namoyish etildi.
✅ Jumladan, BÜİS — banderolli mahsulotlarni kuzatish, DBYS — depozit axborot boshqaruvi, İDİS — qurilish armaturasini kuzatish, KMTS — qimmatbaho metallarni kuzatish hamda UTTS — transport vositalarini identifikatsiya qilish milliy tizimlari bo‘yicha ma’lumotlar taqdim etildi.
Alohida e’tibor İDİS tizimiga qaratildi. Mazkur tizim qurilish armaturasining ishlab chiqarilishi va import qilinishidan boshlab, sotilishi, yetkazib berilishi, laboratoriya sinovlaridan o‘tkazilishi hamda qurilish obyektida qo‘llanilishigacha bo‘lgan jarayonlarni yagona raqamli muhitda kuzatish imkonini beradi. Maxsus himoyalangan yorliqlar, mobil ilovalar va elektron platformalar orqali mahsulotlarning harakati hamda sinov natijalari nazorat qilinadi.
Mazkur amaliy tashrif O‘zbekistonda mahsulotlarning sifati va xavfsizligini ta’minlash, raqamli markirovka va kuzatuv mexanizmlarini takomillashtirish, qalbaki va talabga javob bermaydigan mahsulotlarning bozorga kirib kelishining oldini olish hamda davlat nazorati samaradorligini oshirishda Turkiya tajribasini o‘rganish uchun muhim ahamiyat kasb etdi.