Vazirlar Mahkamasi huzuridagi O'zbekiston texnik jihatdan tartibga solish agentligi

✅ O‘zbekiston texnik jihatdan tartibga solish agentligi Jamoatchilik kengashining navbatdagi yig‘ilishida O‘zbekiston standartlar institutining 2026-yil yanvar–iyul oylarida amalga oshirgan ishlari, asosiy faoliyat ko‘rsatkichlari hamda istiqboldagi vazifalar muhokama qilindi.

✅ Yig‘ilishda Jamoatchilik kengashi raisi Azamat Pardayev, kengash a’zolari, Agentlik hamda O‘zbekiston standartlar instituti mas’ullari ishtirok etdi. Unda standartlashtirish tizimida amalga oshirilayotgan islohotlar, jamoatchilik nazorati, aholi va tadbirkorlik subyektlari bilan ochiq muloqotni kuchaytirish masalalariga alohida e’tibor qaratildi.
 

Ta’kidlanganidek, 2026-yilning yanvar–iyul oylarida Institut tomonidan 2 476 ta standart foydalanish uchun yetkazib berildi, 616 ta standart loyihasi ekspertizadan o‘tkazildi hamda 980 ta standart milliy axborot tizimining standartlar fondi moduliga joylashtirildi. Milliy standartlarning xalqaro standartlar bilan uyg‘unlashtirish darajasi 47 foizga yetkazildi. Shuningdek, belgilangan 800 ta xalqaro standartni qabul qilish rejasiga nisbatan 902 ta xalqaro standart asl tilida qabul qilindi.

Kadrlar salohiyatini oshirish yo‘nalishida ham muhim natijalarga erishildi. Hisobot davrida 2 241 nafar mutaxassisning malakasi oshirilib, reja 149,4 foizga bajarildi. Shuningdek, standartlashtirish, metrologiya va muvofiqlikni baholash sohalarida faoliyat yurituvchi 1 131 nafar mutaxassis attestatsiyadan o‘tkazildi.

Xalqaro standartlashtirish yo‘nalishida ISOlution platformasi orqali 36 ta milliy texnik qo‘mita ISO texnik qo‘mitalari bilan “oyna” texnik qo‘mita tizimida shakllantirildi. 15 ta milliy texnik qo‘mita tomonidan 117 ta ISO standartining ovoz berish byulletenlari ko‘rib chiqildi. Shu bilan birga, transport vositalariga 16 ta VIN (WMI) kodi berilib, ishlab chiqarilgan mahsulotlar uchun 6 894 ta shtrix-kod asl nusxa maketi tayyorlandi.

✅ Yig‘ilishda 2026-yil yanvar–sentabr oylariga belgilangan KPI ko‘rsatkichlari ham ko‘rib chiqildi. Jumladan, xalqaro va Yevropa standartlarini qabul qilish, standartlar fondini yangilash, ma’nan eskirgan standartlarni bekor qilish, kadrlar malakasini oshirish, xalqaro hamkorlik va xizmatlar eksportini kengaytirish bo‘yicha aniq vazifalar belgilandi.

✅ Jamoatchilik kengashi raisi tomonidan uzoq yillar davomida qayta ko‘rib chiqilmagan, zamonaviy texnologik jarayonlar va xalqaro talablarga mos kelmaydigan standartlarni bosqichma-bosqich xatlovdan o‘tkazish, ularni yangilash yoki bekor qilish bo‘yicha takliflar bildirildi. Shuningdek, standartlarni izlash va ulardan foydalanish jarayonlarini soddalashtirish, elektron xizmatlarni rivojlantirish hamda soha mutaxassislarining kasbiy salohiyatini muntazam oshirish muhim vazifa sifatida qayd etildi.