Sanoat kooperatsiyasi va davlat xaridlari agentligi vakillari bilan uchrashuv bo‘lib o‘tdi
2026-08-03 11:00:00 / Yangiliklar
O‘zbekiston texnik jihatdan tartibga solish agentligi direktori Akmal Jumanazarov Sanoat kooperatsiyasi va davlat xaridlari agentligi rahbari Baxtiyor Haydarov bilan uchrashuv o‘tkazdi.
Uchrashuv davomida mehmonlarga “Texnik tartibga solish” milliy axborot tizimining funksional imkoniyatlari batafsil taqdim etildi. Tizim orqali texnik jihatdan tartibga solish sohasidagi jarayonlarni raqamlashtirish, shaffoflikni ta’minlash hamda xizmat ko‘rsatish sifatini oshirish borasida amalga oshirilayotgan ishlar haqida batafsil ma’lumot berildi.
Tomonlar shuningdek, “Texnik tartibga solish” milliy axborot tizimi, jumadan nomuvofiq mahsulotlar reyestri (blacklist)ni davlat xarid birjalari bilan o‘zaro integratsiya qilish orqali elektron ma’lumot almashinuvini yanada kengaytirish masalalarini muhokama qildi.
Ushbu yo‘nalishdagi hamkorlik raqamli transformatsiya jarayonlarini tezlashtirish hamda nomuvofiq mahsulotlarni davlat xaridlaridagi ishtirokini cheklashga xizmat qilishi ta’kidlandi.
Tashrif doirasida delegatsiya vakillari uchun maxsus ekskursiya tashkil etildi. Ekskursiya chog‘ida mehmonlar Agentlik tizimida faoliyat yuritayotgan laboratoriyalar, shu jumladan mobil laboratoriyalarning ish jarayoni bilan bevosita tanishish imkoniyatiga ega bo‘ldi. Ushbu laboratoriyalar mahsulotlarning texnik jihatdan muvofiqligini baholash borasidagi vazifalarni amalga oshirishda muhim ahamiyatga ega ekanligi qayd etildi.