Texnik jihatdan tartibga solish agentligi huzurida tashkil etilgan “Texnik jihatdan tartibga solish sohasida tadbirkorlarni qo‘llab-quvvatlash klubi” doirasida Bojxona qo‘mitasi va Bojxona brokerlari uyushmasi bilan hamkorlikda ochiq muloqot o‘tkazildi.
2026-07-24 11:00:00 / Yangiliklar
O‘zbekiston Respublikasi Prezidentining 2026-yil 16-fevraldagi PF–25-son Farmoniga muvofiq, texnik jihatdan tartibga solish sohasini xalqaro talablar asosida tubdan takomillashtirishga qaratilgan yangi mexanizmlar joriy etilmoqda.
Mazkur Farmon doirasida tadbirkorlik sub’yektlari uchun bir qator qulaylik va yengilliklar yaratildi. Jumladan, eksport bozorlarida talab etiladigan xorijiy standartlar asosida muvofiqlikni baholashga ruxsat berildi, muvofiqlikni baholash sohasida davlat ishtiroki qisqartirildi, akkreditatsiya uchun to‘lanadigan ajratmalar 2,5 barobarga kamaytirildi hamda "Sifat bo‘yicha ko‘makchi" elektron platformasi ishga tushirildi.
Shuningdek, 2026–2028 yillarda 7 865 ta xalqaro standartni milliy standart sifatida qabul qilish, 2 032 turdagi mahsulotni majburiy sertifikatlash amaliyotini bosqichma-bosqich bekor qilish hamda ularni texnik reglamentlar asosida muvofiqlikni baholash tizimiga o‘tkazish rejalashtirilgan.
2027-yil 1 yanvardan boshlab "Conformity Uzbekistan (CUz)" milliy muvofiqlik belgisi joriy etiladi. Shu bilan birga, mahsulotlarni baholashda xavf-xatarga asoslangan yondashuv, modulli muvofiqlikni baholash tizimi va zamonaviy bozor nazorati mexanizmlari bosqichma-bosqich tatbiq etiladi.
Sohani raqamlashtirish yo‘nalishida ham izchil ishlar amalga oshirilmoqda. TRIS.UZ milliy axborot tizimi orqali standartlashtirish, metrologiya, sertifikatlashtirish, akkreditatsiya va davlat nazoratiga oid jarayonlar yagona elektron platformaga birlashtirildi.
Bugungi kunda ushbu tizimda 100 dan ortiq sertifikatlashtirish organi, 400 dan ziyod sinov laboratoriyasi hamda 4,5 mingdan ortiq mutaxassis faoliyat yuritmoqda. Shu vaqtga qadar tizim orqali 261 mingdan ziyod elektron ariza qabul qilinib, 1 milliondan ortiq sinov bayonnomasi hamda 187 mingdan ziyod muvofiqlik sertifikati elektron shaklda rasmiylashtirildi. Bu esa davlat xizmatlarini tezkor, shaffof va inson omilini minimallashtirgan holda ko‘rsatish imkonini yaratmoqda.
Iste’molchilar xavfsizligini ta’minlash maqsadida blacklist.tris.uz manzilida «Nomuvofiq mahsulotlar reyestri» ishga tushirildi. Hozirgi kunga qadar reyestrga 176 ta nomuvofiq mahsulot kiritilgan bo‘lib, mazkur axborot resursi davlat axborot tizimlari bilan integratsiya qilingan.
Shuningdek, 1880 qisqa raqamli koll-markaz orqali tadbirkorlar va fuqarolarga doimiy maslahat xizmatlari ko‘rsatilmoqda.
Xalqaro hamkorlikni kengaytirish doirasida O‘zbekiston IECEE xalqaro tizimiga a’zo bo‘ldi hamda IQNet xalqaro sertifikatlash tarmog‘iga qo‘shildi. Shu bilan birga, SGS, Intertek, Bureau Veritas va TÜV kabi nufuzli xalqaro muvofiqlikni baholash tashkilotlarini mamlakatimizga jalb etish bo‘yicha ishlar izchil davom etmoqda.
Amalga oshirilayotgan mazkur islohotlar milliy mahsulotlarning xalqaro bozorlarda raqobatbardoshligini oshirish, eksport salohiyatini kengaytirish, tadbirkorlik sub’yektlari uchun yanada qulay shart-sharoitlar yaratish hamda iste’molchilarning huquq va manfaatlarini ishonchli himoya qilishga xizmat qiladi.