Vazirlar Mahkamasi huzuridagi O'zbekiston texnik jihatdan tartibga solish agentligi

Yoshlar kuni munosabati bilan Texnik jihatdan tartibga solish agentligi tizimida faoliyat yuritayotgan yosh xodimlar, ilmiy izlanishlar bilan shug‘ullanayotgan mustaqil tadqiqotchilar hamda iqtidorli mutaxassislar ishtirokida ilhomlantiruvchi uchrashuv tashkil etildi. Mazkur tadbirning asosiy maqsadi yoshlarning ilmiy va innovasion salohiyatini yanada rivojlantirish, ularni zamonaviy texnologiyalar sohasidagi ilg‘or tajribalar bilan tanishtirish hamda ochiq muloqot orqali kasbiy rivojlanishga rag‘batlantirishdan iborat bo‘ldi.
Tadbir mehmoni sifatida «O‘zbekiston texnologik metallar kombinati» aksiyadorlik jamiyati Boshqaruv raisi o‘rinbosari, yangi texnologiyalar, innovatsiyalar va sun’iy intellektni rivojlantirish yo‘nalishi rahbari Amir Ilgizovich Abidov ishtirok etdi.

Uchrashuv avvalida mehmon Agentlik tizimidagi tashkilotlar faoliyati bilan yaqindan tanishdi. Xususan, ilmiy laboratoriyalar, tadqiqot markazlari, zamonaviy uskunalar imkoniyatlari hamda ularda faoliyat yuritayotgan iqtidorli yosh olimlar va mustaqil tadqiqotchilarning ilmiy ishlanmalari taqdim etildi. Suhbat davomida amalga oshirilayotgan innovasion loyihalar, yangi ishlanmalar va ularning amaliyotdagi ahamiyati xususida ma’lumotlar berildi.

Shuningdek, yoshlarning ilmiy va innovasion g‘oyalarini qo‘llab-quvvatlash, ularning tashabbuslarini amaliyotga tatbiq etish uchun yaratilayotgan imkoniyatlar, ilmiy tadqiqotlarni tijoratlashtirish, xalqaro hamkorlikni kengaytirish va innovasion ekotizimni mustahkamlashning ustuvor yo‘nalishlari haqida fikr almashildi.

Amir Abidov o‘zining ta’lim olish va mehnat faoliyati davomida to‘plagan tajribasi, nufuzli xalqaro loyihalardagi ishtiroki, innovatsiyalar va yuqori texnologiyalar sohasida amalga oshirgan amaliy ishlari haqida so‘zlab berdi. U zamonaviy mehnat bozorida raqobatbardosh kadr bo‘lish uchun yoshlar doimiy izlanishda bo‘lishi, yangi bilim va ko‘nikmalarni muntazam o‘zlashtirishi, xorijiy tillarni puxta egallashi hamda sun’iy intellekt va raqamli texnologiyalardan samarali foydalanish ko‘nikmalarini rivojlantirishi zarurligini ta’kidladi.
Mehmon, shuningdek, innovasion g‘oyalarni amaliy loyihalarga aylantirish, startaplarni rivojlantirish, jamoada ishlash madaniyati, liderlik qobiliyati va strategik fikrlash ko‘nikmalarining ahamiyati haqida ham atroflicha to‘xtalib o‘tdi. Yoshlarga o‘z ustida muntazam ishlash, ilmiy tadqiqotlar bilan faol shug‘ullanish va xalqaro tajribalarni o‘rganish bo‘yicha muhim tavsiyalar berildi.

Uchrashuv savol-javoblarga boy, samimiy va ochiq muloqot ruhida o‘tdi. Ishtirokchilar sun’iy intellekt, innovatsiyalar, startaplar, texnologik rivojlanish, ilmiy faoliyatni qo‘llab-quvvatlash va kelgusidagi istiqbolli loyihalar yuzasidan o‘zlarini qiziqtirgan savollar bilan murojaat qilib, mutaxassisdan amaliy tavsiya va qimmatli fikr-mulohazalar oldilar.
Mazkur uchrashuv yosh mutaxassislar uchun nafaqat tajriba almashish maydoni, balki kelgusida yangi g‘oyalar, istiqbolli loyihalar va innovasion tashabbuslarni amalga oshirishga ilhom bag‘ishlagan muhim muloqot sifatida yodda qoldi.