O‘zbekiston texnik jihatdan tartibga solish agentligi va Alisher Navoiy nomidagi O‘zbekiston milliy kutubxonasi o‘rtasida amaliy hamkorlik yo‘lga qo‘yildi
2026-07-21 10:00:00 / Yangiliklar
Texnik jihatdan tartibga solish agentligi direktori A. Jumanazarov Alisher Navoiy nomidagi O‘zbekiston milliy kutubxonasida bo‘lib, mamlakatimizdagi eng yirik axborot-ma’rifat maskanida kitobxonlar uchun yaratilgan shart-sharoitlar, zamonaviy xizmatlar hamda ilmiy-ma’rifiy faoliyat bilan tanishdi.
Tanishish davomida asosiy kitobxonlar zali, elektron resurslar, dissertatsiyalar va ilmiy adabiyotlar, noyob va qimmatli qo‘lyozmalar, bolalar va xorijiy adabiyotlar zallari, matbuot va davriy nashrlar bo‘limi hamda Axborot-kutubxona texnologiyalari markazi faoliyati ko‘zdan kechirildi.
Uchrashuvda noyob kitoblar va qo‘lyozmalarni asrashda metrologiyaning o‘rni va ahamiyati muhokama qilindi. Ta’kidlanganidek, fondlarda harorat, nisbiy namlik, yorug‘lik intensivligi kabi mikroiqlim ko‘rsatkichlarini aniq o‘lchash va doimiy monitoring qilish madaniy merosni uzoq muddat saqlashning muhim sharti hisoblanadi.
Tomonlar o‘rtasida Texnik jihatdan tartibga solish agentligi tizimidagi Metrologiya instituti va Alisher Navoiy nomidagi O‘zbekiston milliy kutubxonasi o‘rtasida amaliy hamkorlikni yo‘lga qo‘yish bo‘yicha kelishuvga erishildi.
Hamkorlik doirasida:
🔹 noyob qo‘lyozmalar saqlanadigan fondlar uchun harorat va nisbiy namlikni real vaqt rejimida nazorat qiluvchi mahalliy Data Logger qurilmasini ishlab chiqish;
🔹 kutubxonada Texnik jihatdan tartibga solish agentligining maxsus axborot burchagini tashkil etish;
🔹 kitoblar va qo‘lyozmalarni quyosh hamda ultrabinafsha nurlarining salbiy ta’siridan muhofaza qilish bo‘yicha ilmiy tavsiyalar tayyorlash;
🔹 fondlarda mikroiqlim va namlik ko‘rsatkichlarini nazorat qilishga ixtisoslashgan zamonaviy laboratoriya tashkil etish yo‘nalishlarida hamkorlik qilishga kelishib olindi.
Mazkur hamkorlik madaniy meros ob’yektlarini zamonaviy metrologik yechimlar asosida muhofaza qilish, ilmiy innovatsiyalarni amaliyotga joriy etish hamda milliy boyligimizni kelajak avlodlarga butun holda yetkazishga xizmat qiladi.