China Testing & Certification International Group Co., Ltd. (CTC) bilan qurilish mahsulotlari sinovi sohasida hamkorlik istiqbollari muhokama qilindi
2026-07-16 11:00:00 / Yangiliklar
China Testing & Certification International Group Co., Ltd. (CTC) kompaniyasi bilan onlayn uchrashuv tashkil etildi. Uchrashuvdan ko‘zlangan asosiy maqsad qurilish mahsulotlarini sinovdan o‘tkazish sohasida ikki tomonlama hamkorlikni rivojlantirish hamda xalqaro talablarga javob beradigan qo‘shma sinov laboratoriyasini tashkil etish imkoniyatlarini muhokama qilishdan iborat bo‘ldi.
Muzokaralar davomida qurilish materiallari va mahsulotlarini sinovdan o‘tkazishda zamonaviy laboratoriya infratuzilmasini shakllantirish, ilg‘or sinov uskunalarini joriy etish, xalqaro standartlar asosida laboratoriya faoliyatini tashkil etish va akkreditatsiya jarayonlarini amalga oshirish masalalari ko‘rib chiqildi.
Shuningdek, tomonlar laboratoriyani tashkil etish bo‘yicha tashkiliy-huquqiy mexanizmlar, texnik hamkorlik, mutaxassislarni tayyorlash va malakasini oshirish, sinov uslublarini joriy etish hamda tajriba almashish yo‘nalishlarida hamkorlik istiqbollarini muhokama qildilar.
Uchrashuv yakunlariga ko‘ra, qurilish mahsulotlarini baholash tizimini xalqaro talablar darajasiga olib chiqish, mahalliy ishlab chiqaruvchilarning eksport salohiyatini oshirish va sifat infratuzilmasini yanada rivojlantirish maqsadida qo‘shma sinov laboratoriyasini tashkil etish bo‘yicha hamkorlikni davom ettirish yuzasidan o‘zaro kelishuvga erishildi.