"Milliy sanoat zanjiri" ko‘rgazmasida mahalliy ishlab chiqaruvchilarga amaliy ko‘mak
2026-07-15 11:00:00 / Yangiliklar
Joriy yilning 15–16 iyul kunlari Samarqand viloyati Jomboy tumanidagi "Sof Expo Samarkand" majmuasida transport sohasiga ixtisoslashgan "Milliy sanoat zanjiri" ko‘rgazmasi bo‘lib o‘tmoqda.
Ko‘rgazmada O‘zbekiston texnik jihatdan tartibga solish agentligi hamda uning tizim tashkilotlari faol ishtirok etib, transport sohasida faoliyat yuritayotgan mahalliy ishlab chiqaruvchilarga texnik jihatdan tartibga solish yo‘nalishida amaliy ko‘mak ko‘rsatmoqda.
Tadbirning asosiy maqsadi sanoat kooperatsiyasini rivojlantirish, import o‘rnini bosuvchi mahsulotlar ishlab chiqarishni kengaytirish hamda mahalliy ishlab chiqaruvchilarning yirik xaridorlar bilan hamkorligini mustahkamlashdan iborat. Ko‘rgazma doirasida Agentlik mutaxassislari transport vositalari, ehtiyot qismlar, butlovchi buyumlar va transport infratuzilmasi uchun mahsulotlar ishlab chiqaruvchi tadbirkorlarga:
• mahsulotlarga qo‘yiladigan standart talablari;
• milliy va xalqaro standartlarni joriy etish;
• mahsulotlarni sinovdan o‘tkazish;
• sertifikatlashtirish;
• metrologik ta’minot masalalari bo‘yicha amaliy maslahat va tushuntirishlar bermoqda.
Shuningdek, mahalliy mahsulotlarning texnik talablarga muvofiqligini ta’minlash, ularning sifat va raqobatbardoshligini oshirish, import o‘rnini bosuvchi yangi mahsulotlarni o‘zlashtirish hamda eksport bozorlari talablariga moslashtirish yuzasidan manzilli maslahatlar taqdim etilmoqda.
O‘zbekiston texnik jihatdan tartibga solish agentligi mahalliy ishlab chiqaruvchilarni qo‘llab-quvvatlash, sifat infratuzilmasini takomillashtirish va transport sanoatida raqobatbardosh mahsulotlar ishlab chiqarishga ko‘maklashish yo‘lida tadbirkorlar bilan yaqin hamkorlikni davom ettirmoqda.