Quyosh panellari sinov infratuzilmasini rivojlantirish: O‘zbekiston–Koreya hamkorligining yangi bosqichi
2026-07-15 09:30:00 / Yangiliklar
O‘zbekiston texnik jihatdan tartibga solish agentligida Koreya Respublikasining Energetika texnologiyalarini baholash va rejalashtirish instituti (KETEP) hamda Koreya sinov laboratoriyasi (KCL) vakillari bilan quyosh fotoelektr panellarini sinovdan o‘tkazish laboratoriyasini tashkil etish loyihasi muhokama qilindi.
Mazkur loyiha Koreya Respublikasi Hukumati granti asosida 2026–2029 yillarda amalga oshirilishi rejalashtirilgan bo‘lib, mamlakatda qayta tiklanuvchi energiya sohasining texnik infratuzilmasini mustahkamlashga xizmat qiladi. Laboratoriyaning tashkil etilishi mahalliy ishlab chiqaruvchilar va import qilinuvchi mahsulotlarni xalqaro talablar asosida baholash imkoniyatlarini kengaytiradi.
Loyiha doirasida quyosh panellarini sinovdan o‘tkazish bo‘yicha IEC xalqaro standartlarini joriy etish, zamonaviy sinov usullarini o‘zlashtirish, yuqori aniqlikdagi laboratoriya uskunalarini joriy qilish hamda milliy mutaxassislarning texnik salohiyatini oshirish nazarda tutilgan.
Mazkur tashabbus texnik jihatdan tartibga solish tizimini xalqaro amaliyotlar bilan uyg‘unlashtirish, qayta tiklanuvchi energiya sohasida mahsulotlar sifati va xavfsizligini ta’minlash, shuningdek, milliy mahsulotlarning tashqi bozorlarda raqobatbardoshligini oshirishga xizmat qiladigan muhim institusional qadam sifatida baholanmoqda.