O‘zbekiston delegatsiyasi MDH Davlatlararo kengashining 69-yig‘ilishida ishtirok etdi
2026-07-10 10:00:00 / Yangiliklar
🔴 Qirg‘iz Respublikasida Mustaqil Davlatlar Hamdo‘stligi (MDH) Standartlashtirish, metrologiya va sertifikatlashtirish bo‘yicha Davlatlararo kengashining (MGS) 69-yig‘ilishi bo‘lib o‘tdi. Mazkur nufuzli tadbirda O‘zbekiston Respublikasi delegatsiyasi faol ishtirok etdi.
🚫 Yig‘ilishda Ozarbayjon, Armaniston, Belarus, Qozog‘iston, Qirg‘iziston, Rossiya, Tojikiston va O‘zbekistonning standartlashtirish, metrologiya, muvofiqlikni baholash hamda akkreditatsiya sohasidagi vakolatli organlari rahbarlari va mutaxassislari, shuningdek, ISO, IEC va UNIDO kabi xalqaro tashkilotlar, Yevroosiyo iqtisodiy komissiyasi, MDH Ijroiya qo‘mitasi, MGS Standartlar byurosi hamda boshqa nufuzli tashkilotlar vakillari ishtirok etdi.
Yig‘ilish davomida MDH mamlakatlarida standartlashtirish, metrologiya va muvofiqlikni baholash tizimlarini yanada takomillashtirish, sifat infratuzilmasini rivojlantirish hamda davlatlararo hamkorlikni mustahkamlashga qaratilgan qator muhim masalalar ko‘rib chiqildi.
Shuningdek, yig‘ilish ishtirokchilari davlatlararo standartlarni uchinchi mamlakatlarda qo‘llash bo‘yicha tavsiyalar hamda standartlashtirish sohasidagi ekspertlarga qo‘yiladigan umumiy talablarni tasdiqladilar.
Muhokamalar yakunida metrologiya yo‘nalishidagi iqtidorli yosh mutaxassislarni qo‘llab-quvvatlash maqsadida MGS hamda COOMET hamkorligida yagona xalqaro tanlov platformasini yaratish bo‘yicha kelishuvga erishildi.
Tadbir doirasida, shuningdek, mahsulot va xizmatlar sifati sohasidagi yutuqlar uchun 2025-yilgi MDH mukofoti laureatlari va diplomantlarini taqdirlash marosimi ham o‘tkazildi.
🔴 O‘zbekistonning mazkur yig‘ilishdagi faol ishtiroki mamlakatimizda texnik jihatdan tartibga solish, standartlashtirish, metrologiya va sifat infratuzilmasini xalqaro talablar asosida rivojlantirish, shuningdek, MDH doirasidagi ko‘p tomonlama hamkorlikni yanada mustahkamlashga qaratilgan izchil islohotlarning amaliy ifodasi bo‘ldi. Mazkur yo‘nalishdagi xalqaro hamkorlik mamlakatimizning sifat infratuzilmasini takomillashtirish, mahsulot va xizmatlar raqobatbardoshligini oshirish hamda xalqaro bozorlarga integratsiyalashuv jarayonlarini jadallashtirishga xizmat qilmoqda.