UNIDO va O‘zbekiston vakillari o‘rtasida sifat infratuzilmasi indeksi bo‘yicha uchrashuv o‘tkazildi
2026-07-09 13:00:00 / Yangiliklar
✅ Qirg‘iz Respublikasida bo‘lib o‘tayotgan Mustaqil Davlatlar Hamdo‘stligining Standartlashtirish, metrologiya va sertifikatlashtirish bo‘yicha davlatlararo kengashi (MGS)ning 69-yig‘ilishi doirasida BMTning Sanoat taraqqiyoti tashkiloti (UNIDO) va O‘zbekiston vakillari o‘rtasida sifat infratuzilmasi indeksi (QI4SD Index) reytingiga bag‘ishlangan uchrashuv bo‘lib o‘tdi.
☑️ Uchrashuv davomida O‘zbekistonning milliy sifat infratuzilmasini xalqaro mezonlar asosida baholash, mamlakatning QI4SD indeksidagi ko‘rsatkichlarini yaxshilash, shuningdek, metrologiya, standartlashtirish, akkreditatsiya, muvofiqlikni baholash va sifat siyosati yo‘nalishlarida amalga oshirilayotgan islohotlarni yanada takomillashtirish masalalari muhokama qilindi.
Tomonlar sifat infratuzilmasini rivojlantirish mamlakat iqtisodiyotining raqobatbardoshligini oshirish, eksport salohiyatini kengaytirish hamda mahsulot va xizmatlar sifatini ta’minlashda muhim ahamiyat kasb etishini ta’kidladilar.
Uchrashuvda QI4SD Index reytingida yuqori natijalarga erishish maqsadida institutsional salohiyatni mustahkamlash, xalqaro standartlarni keng joriy etish, texnik hamkorlik loyihalarini amalga oshirish va milliy sifat infratuzilmasini yanada rivojlantirish bo‘yicha qo‘shma chora-tadbirlarni amalga oshirish yuzasidan fikr almashildi.
Shuningdek, UNIDO ekspertlari tomonidan QI4SD Index metodologiyasi, baholash mezonlari va mamlakat ko‘rsatkichlarini yaxshilash bo‘yicha amaliy tavsiyalar taqdim etildi.
🔛 Uchrashuv yakunida sifat infratuzilmasini xalqaro talablar asosida rivojlantirish, tajriba almashish va o‘zaro hamkorlikni yanada mustahkamlash bo‘yicha kelishuvlarga erishildi.