Tibbiy buyumlar va tibbiy texnika sohasidagi tadbirkorlar bilan ochiq muloqot o‘z ishini boshladi
2026-07-10 10:00:00 / Yangiliklar
Texnik jihatdan tartibga solish agentligi huzurida tashkil etilgan Tadbirkorlarni qo‘llab-quvvatlash klubi doirasida tibbiy buyumlar va tibbiy texnika mahsulotlarini ishlab chiqarish hamda import qilish yo‘nalishida faoliyat yuritayotgan tadbirkorlik subyektlari bilan ochiq muloqot o‘z ishini boshladi.
🫥 Ochiq muloqot O‘zbekiston Respublikasi Prezidentining 2026-yil 20-avgust – Tadbirkorlar kuni arafasida o‘tkaziladigan tadbirkorlar bilan VI ochiq muloqotiga puxta tayyorgarlik ko‘rish maqsadida Farmasevtika tarmog‘ini rivojlantirish agentligi hamda Tibbiyot mahsulotlari xavfsizligi markazi bilan hamkorlikda tashkil etildi. Tadbir davlat organlari va tadbirkorlar o‘rtasidagi ochiq muloqotni yanada mustahkamlashga xizmat qilmoqda.
Tadbir davomida O‘zbekiston Respublikasi Prezidentining 2026-yil 16-fevraldagi PF–25-son Farmoni bilan tadbirkorlik subyektlari uchun yaratilgan yangi imkoniyat va qulayliklar, shuningdek texnik jihatdan tartibga solish sohasida amalga oshirilayotgan islohotlarning bugungi holati yuzasidan taqdimot o‘tkazildi.
Shuningdek, uchrashuvda tibbiy buyumlar va tibbiy texnika mahsulotlarining ishlab chiqarishdan iste’molchigacha bo‘lgan zanjiridagi dolzarb masalalar muhokama qilinib, mahsulotlar xavfsizligini ta’minlash, ishlab chiqarishni xalqaro standartlar talablariga moslashtirish, eksport salohiyatini oshirish hamda ichki bozorda sifatsiz mahsulotlar realizatsiyasining oldini olish masalalariga alohida e’tibor qaratildi.
🫥 Muloqot davomida tadbirkorlik subyektlari tomonidan bildirilgan taklif va tashabbuslar tinglanib, ularni amaliyotga tatbiq etish hamda sohadagi mavjud muammolarni bartaraf etish yuzasidan mas’ul tashkilotlar vakillari bilan atroflicha fikr almashildi.
Tadbirkorlarni qo‘llab-quvvatlash klubi doirasida bunday ochiq muloqotlarni muntazam o‘tkazish orqali tadbirkorlik subyektlari bilan samarali hamkorlikni yanada mustahkamlash, ularning takliflarini inobatga olgan holda texnik jihatdan tartibga solish sohasidagi islohotlar samaradorligini oshirish ko‘zda tutilgan.