Vazirlar Mahkamasi huzuridagi O'zbekiston texnik jihatdan tartibga solish agentligi

⛈ O‘zbekiston texnik jihatdan tartibga solish agentligida o‘yinchoq mahsulotlari ishlab chiqaruvchi tadbirkorlar ishtirokida ochiq muloqot o‘tkazildi. Tadbir Prezident tomonidan texnik jihatdan tartibga solish sohasida davlat organlari va tadbirkorlar o‘rtasida tizimli muloqotni ta’minlash bo‘yicha belgilangan vazifalar ijrosi hamda Tadbirkorlar kuni arafasidagi ochiq muloqotga tayyorgarlik doirasida tashkil etildi.
 

Muloqot davomida Prezidentning 2026-yil 16-fevraldagi PF–25-son Farmoni asosida sohada amalga oshirilayotgan islohotlar taqdim etildi. Qayd etilganidek, tadbirkorlar uchun eksport bozorlarida xorijiy standartlar asosida muvofiqlikni baholash imkoniyati yaratildi, akkreditatsiya yig‘imlari 2,5 barobarga kamaytirildi, milliy standartlar ixtiyoriy asosga o‘tkazildi hamda xalqaro standartlarni to‘g‘ridan to‘g‘ri qo‘llash amaliyoti joriy etildi.

⚡️ Taqdimotda o‘yinchoq mahsulotlari xavfsizligini ta’minlash masalalariga alohida e’tibor qaratildi. Amaldagi texnik reglament 222 ta xavfsizlik ko‘rsatkichini qamrab olgan bo‘lsa, xalqaro talablar asosida ishlab chiqilayotgan yangi texnik reglamentga qo‘shimcha qariyb 200 ta xavfsizlik talabi kiritilishi hamda uni 2028-yildan amalga joriy etish rejalashtirilgani ma’lum qilindi.
 

Shuningdek, respublikada o‘yinchoq mahsulotlarini sinovdan o‘tkazish imkoniyatiga ega 34 ta akkreditatsiyadan o‘tgan laboratoriya faoliyat yuritayotgani, ularning texnik imkoniyatlarini kengaytirish va xalqaro talablarga muvofiq yangi sinov turlarini joriy etish ishlari davom etayotgani qayd etildi. 2026-yilda savdo tarmoqlarida o‘tkazilgan nazorat xaridlari natijasida tekshirilgan 60 turdagi o‘yinchoq mahsulotining 26 tasida xavfsizlik talablariga nomuvofiqliklar aniqlangani ham ma’lum qilindi.

⚡️ Tadbirda eksport salohiyatini oshirishga qaratilgan yangi mexanizmlar, jumladan, Chexiya Respublikasidagi “Made in Uzbekistan” shou-rumi, Yevropa Ittifoqining CE markirovkasini olish bo‘yicha mahalliy ishlab chiqaruvchilarga ko‘rsatilayotgan amaliy ko‘mak hamda texnik jihatdan tartibga solish sohasini raqamlashtirish doirasida TRIS milliy axborot tizimi va nomuvofiq mahsulotlar reyestrining imkoniyatlari haqida ma’lumot berildi.

⚡️ Ochiq muloqot yakunida tadbirkorlarning taklif va tashabbuslari tinglandi. Bildirilgan fikrlar texnik jihatdan tartibga solish tizimini yanada takomillashtirish, o‘yinchoq mahsulotlari xavfsizligini ta’minlash, xalqaro standartlarni keng joriy etish hamda eksport imkoniyatlarini oshirishga qaratilgan amaliy chora-tadbirlarni belgilashda inobatga olinishi ta’kidlandi.