Vazirlar Mahkamasi huzuridagi O'zbekiston texnik jihatdan tartibga solish agentligi

O‘zbekiston Texnik jihatdan tartibga solish agentligida Rossiya Federatsiyasi vakillari bilan texnik jihatdan tartibga solish, sinov infratuzilmasini rivojlantirish hamda mahsulotlarning xalqaro standartlarga muvofiqligini baholash yo‘nalishlaridagi hamkorlik masalalariga bag‘ishlangan uchrashuv bo‘lib o‘tdi.

Muloqot davomida xalqaro savdoda texnik to‘siqlarni bartaraf etishda sinov laboratoriyalarining o‘rni alohida qayd etildi. Ta’kidlanganidek, zamonaviy sinov laboratoriyalari mahsulotlarning xalqaro standartlar talablariga muvofiqligini tasdiqlash, ichki bozorni sifatsiz mahsulotlardan himoya qilish hamda mahalliy ishlab chiqaruvchilarning eksport salohiyatini oshirishda muhim ahamiyat kasb etadi.
 

Tomonlar amaliy hamkorlik doirasida Toshkent viloyatining Chirchiq shahrida joylashgan “Chirchiq” kimyo-industrial texnoparki hududida qo‘shma sinov laboratoriyasini tashkil etish istiqbollarini atroflicha muhokama qildilar.

Qayd etilganidek, mazkur laboratoriya kimyo mahsulotlarini zamonaviy talablar asosida sinovdan o‘tkazish, ularning sifat va xavfsizlik ko‘rsatkichlarini baholash hamda tashqi bozorlar talablariga muvofiqligini tasdiqlashga xizmat qiladi. Bu esa eksport qilinayotgan mahsulotlarning raqobatbardoshligini oshirish va xalqaro bozorlarga chiqish imkoniyatlarini kengaytirishga zamin yaratadi.

Shuningdek, uchrashuvda texnik jihatdan tartibga solish, standartlashtirish va muvofiqlikni baholash sohalarida o‘zaro tajriba almashish, zamonaviy laboratoriya infratuzilmasini rivojlantirish hamda istiqbolli qo‘shma loyihalarni amalga oshirish masalalari yuzasidan fikr almashildi.
 

Uchrashuv yakunida tomonlar O‘zbekiston va Rossiya Federatsiyasi o‘rtasida texnik jihatdan tartibga solish sohasidagi ikki tomonlama hamkorlikni yanada mustahkamlash, qo‘shma loyihalarni izchil amalga oshirish hamda o‘zaro manfaatli tashabbuslarni qo‘llab-quvvatlash bo‘yicha hamkorlikni davom ettirishga tayyor ekanliklarini bildirdilar.