Ishlab chiqaruvchi korxonalar bilan texnik jihatdan tartibga solish, mahsulot sifati va bozor nazorati masalalari muhokama qilindi
2026-07-01 10:00:00 / Yangiliklar
✅ Texnik jihatdan tartibga solish agentligi direktori Akmal Jumanazarov tomonidan Toshkent viloyatining Ohangaron va Angren shaharlarida faoliyat yurituvchi ishlab chiqaruvchi korxonalar rahbarlari bilan uchrashuvlar o‘tkazildi.
✅ Jumladan, “EAST MINING INVEST” MChJ QK (Arton brendi) hamda “Angren Gofrokarton Fabrikasi” MChJ XK rahbariyati bilan bo‘lib o‘tgan muloqotlar davomida avtoklavlangan gazbeton, devor va to‘siq bloklari, shuningdek, gofrirovka qilingan qog‘oz, karton va karton tara (idish)lar ishlab chiqarish jarayonlari, mahsulotlar sifati hamda ularning xavfsizligini ta’minlash masalalari ko‘rib chiqildi.
Uchrashuvlarda mahsulotlarning texnik reglamentlar va standartlar talablariga muvofiqligini ta’minlash, nomuvofiq mahsulotlarning muomalaga chiqarilishining oldini olish hamda ichki bozorda bozor nazorati samaradorligini oshirish masalalari muhokama qilindi.
Shuningdek, korxonalarning sinov laboratoriyalari salohiyatidan samarali foydalanish, ularni rivojlantirish va malakaliligini ma’qullashdan o‘tkazish, mahsulotlarni xalqaro standartlar talablari asosida sinovdan o‘tkazish hamda ishlab chiqarish jarayonlariga xalqaro standartlarni keng joriy etish bo‘yicha hamkorlik istiqbollari ko‘rib chiqildi.
✅ Muloqotlar davomida mahsulotlar sifatini oshirish, ularning raqobatbardoshligini ta’minlash, ichki va tashqi bozorlarda ishonchliligi hamda sifat ko‘rsatkichlarini yanada yaxshilash yuzasidan amaliy tavsiyalar berildi.
Shu bilan birga, O‘zbekiston Respublikasi Prezidentining 2026-yil 16-fevraldagi PF–25-son Farmoni asosida tadbirkorlar uchun yaratilgan imkoniyat va imtiyozlar, texnik jihatdan tartibga solish sohasida amalga oshirilayotgan islohotlar, standartlashtirish va metrologiya yo‘nalishlarida ko‘rsatilayotgan xizmatlar haqida batafsil ma’lumot berildi.
Uchrashuv yakunida xalqaro standartlarni joriy etish, bozor nazoratini takomillashtirish, mahsulotlar sifatini ta’minlash hamda korxona xodimlari malakasini oshirish yo‘nalishlarida hamkorlikni yanada kengaytirish bo‘yicha kelishuvga erishildi.