AQSHning standartlashtirish va bozor nazorati sohasidagi ilg‘or tajribasi o‘rganilmoqda
2026-06-24 12:00:00 / Yangiliklar
AQSHning Vashington shahrida O‘zbekiston texnik jihatdan tartibga solish agentligi delegatsiyasi hamda AQSH Atrof-muhitni muhofaza qilish agentligi (Environmental Protection Agency – EPA) vakillari o‘rtasida uchrashuv bo‘lib o‘tdi.
Ma’lumot uchun, EPA AQSH federal hukumatining mustaqil ijro etuvchi agentligi bo‘lib, 1970-yilda tashkil etilgan. Agentlikning asosiy vazifasi inson salomatligini saqlash hamda atrof-muhitni, jumladan havo, suv va yer resurslarini muhofaza qilishdan iborat. EPA AQSH Kongressi tomonidan qabul qilingan qonunlar asosida turli standart va talablarni ishlab chiqadi hamda ularning bajarilishi ustidan nazoratni amalga oshiradi.
Uchrashuv davomida so‘nggi yillarda O‘zbekiston va AQSH o‘rtasidagi munosabatlar izchil rivojlanib borayotgani, turli sohalardagi hamkorlik yangi bosqichga ko‘tarilgani alohida ta’kidlandi. Xususan, Toshkent xalqaro investitsiya forumi doirasida AQSH kompaniyalarining faol ishtiroki, amerikalik ishbilarmonlarning O‘zbekistondagi loyihalarga bo‘lgan qiziqishi ortib borayotgani qayd etildi.
Tomonlar standartlashtirish va bozor nazorati yo‘nalishidagi hamkorlik O‘zbekiston texnik jihatdan tartibga solish agentligi hamda EPA o‘rtasidagi istiqbolli hamkorlik yo‘nalishlaridan biri ekanini e’tirof etdilar. Muzokaralar davomida texnik jihatdan tartibga solish, mahsulotlar xavfsizligini ta’minlash, bozor nazoratini takomillashtirish va ilg‘or xalqaro tajribalarni joriy etish masalalari yuzasidan fikr almashildi.
Shuningdek, standartlashtirish va bozor nazorati sohasida hamkorlikni yanada rivojlantirishga qaratilgan qator ustuvor yo‘nalishlar belgilab olindi. Jumladan, texnik jihatdan tartibga solish sohasida nazorat-inspeksiya faoliyatini takomillashtirish, inspektorlar uchun trening-seminarlar tashkil etish, amaliyot va malaka oshirish dasturlarini yo‘lga qo‘yish bo‘yicha kelishuvga erishildi.
Uchrashuv yakunlari bo‘yicha tomonlar o‘zaro tajriba almashish, mutaxassislar salohiyatini oshirish hamda bozor nazorati tizimini xalqaro standartlar asosida yanada takomillashtirish bo‘yicha hamkorlikni davom ettirishga tayyor ekanliklarini bildirdilar.