Vazirlar Mahkamasi huzuridagi O'zbekiston texnik jihatdan tartibga solish agentligi

Fraksiya a’zolari texnik jihatdan tartibga solish sohasini takomillashtirishga qaratilgan qonun loyihasini atroflicha muhokama qildilar.

Mazkur qonun loyihasi sohadagi mavjud muammolarni bartaraf etish, tadbirkorlik faoliyatini qo‘llab-quvvatlash hamda milliy tizimni xalqaro standartlarga moslashtirishni nazarda tutadi. Hujjat bilan “Metrologiya to‘g‘risida”, “Standartlashtirish to‘g‘risida”, “Texnik jihatdan tartibga solish to‘g‘risida” hamda “Muvofiqlikni baholash organlarini akkreditatsiya qilish to‘g‘risida”gi qonunlarga tegishli o‘zgartirish va qo‘shimchalar kiritilmoqda.

Qonun loyihasiga mas’ul deputat Muqaddasxon Axmedovaning ta’kidlashicha, ushbu hujjat milliy sifat infratuzilmasining samarali boshqaruv modelini yaratish, texnik jihatdan tartibga solish, metrologiya va muvofiqlikni baholash sohalarida manfaatlar to‘qnashuvining oldini olishga xizmat qiladi.

Shuningdek, qonun loyihasi fraksiya yig‘ilishida batafsil muhokama qilinib, uni ikkinchi o‘qishga tayyorlash jarayonida deputatlar tomonidan bildirilgan takliflar hujjat matnida o‘z aksini topgani alohida qayd etildi. Qonun loyihasining qabul qilinishi mazkur sohalarda qo‘llaniladigan ayrim talablar hamda atamalarni Jahon savdo tashkiloti qoidalari va normalariga muvofiqlashtirish imkonini beradi.

Bundan tashqari, fraksiya a’zolari “O‘zbekiston Respublikasining Jinoyat va Jinoyat-protsessual kodekslariga davlat chegarasini qo‘riqlash hamda himoya qilishni yanada kuchaytirishga qaratilgan o‘zgartirish va qo‘shimchalar kiritish to‘g‘risida”gi qonun loyihasini ham ko‘rib chiqdilar.

Muhokamalar davomida deputatlar mazkur hujjat aholi tinchligini ta’minlash, mamlakat xavfsizligi va iqtisodiy barqarorlikni mustahkamlashga xizmat qilishini inobatga olib, uni qo‘llab-quvvatladilar.

Qizg‘in muhokamalardan so‘ng, har ikki qonun loyihasi deputatlar tomonidan ma’qullandi.