Yangi Oʻzbekistonda korrupsiyaga qarshi kurashish: huquqiy islohotlar va raqamli mexanizmlar
2026-01-23 11:05:00 / Yangiliklar
Bugun Oʻzbekiston texnik jihatdan tartibga solish agentligida Oʻzbekiston Respublikasi Prezidenti tomonidan 2025-yil 26-dekabr kuni Oliy Majlis va Oʻzbekiston xalqiga yoʻllangan Murojaatnoma hamda 2025-yil 30-dekabrdagi “Oʻzbekiston Respublikasida korrupsiyaning oldini olish va unga qarshi kurashish tizimini yanada takomillashtirish toʻgʻrisida”gi PF–270-sonli Farmoni mazmun-mohiyatiga bagʻishlangan seminar boʻlib oʻtdi.
Tadbirda Oʻzbekiston Respublikasi Huquqni muhofaza qilish akademiyasi prokurori, yuridik fanlari doktori Timur Safarov ishtirok etib, davlatimiz rahbari tomonidan belgilangan ustuvor vazifalar, xususan davlat boshqaruvini raqamlashtirish, sud-huquq tizimini takomillashtirish hamda korrupsiyaga qarshi kurashishda zamonaviy, preventiv mexanizmlarni joriy etish masalalari yuzasidan batafsil maʼruza qildi.
Yigʻilishda Agentlik direktorining oʻrinbosari T. Mashanpin ham ishtirok etib, texnik jihatdan tartibga solish sohasida amalga oshirilayotgan islohotlar, xalqaro standartlarga moslashuv hamda korrupsiyaning oldini olishga qaratilgan chora-tadbirlarni tizimli ravishda amalga oshirish muhimligini taʼkidladi.
Tadbir davomida fuqarolik jamiyati institutlari ishtirokini kengaytirish, jamoatchilik nazoratini kuchaytirish, korrupsiyaviy huquqbuzarliklar haqida xabar bergan shaxslarni himoya qilish va ragʻbatlantirish mexanizmlarini joriy etish masalalariga ham alohida eʼtibor qaratildi.
Yigʻilish yakunida Prezident Murojaatnomasi va PF–270-sonli Farmonda belgilangan vazifalarni soʻzsiz va samarali ijro etish, sohada korrupsiyaga qarshi madaniyatni shakllantirish har bir davlat xizmatchisining ustuvor vazifasi ekani taʼkidlandi.