Nurota tumani jadal rivojlantiriladi
2025-10-24 11:35:00 / Yangiliklar
Mazkur dastur O‘zbekiston Respublikasi Prezidentining “Alohida tuman (shahar) va mahallalarni aholining yashashi va tadbirkorlik faoliyati bilan shug‘ullanishi uchun namunali hududga aylantirish chora-tadbirlari to‘g‘risida”gi 298-sonli Qarori hamda PF-186-son Farmoni ijrosi doirasida “Aholi va tadbirkorlar manfaatlariga xizmat qilish” tamoyilini amaliyotga joriy etishga qaratilgan.
Shu doirada Nurota tumaniga “Yangi O‘zbekiston qiyofasidagi tuman” maqomi berilib, uni kompleks rivojlantirish uchun 100 milliard so‘m mablag‘ ajratildi. Ushbu mablag‘ tuman infratuzilmasini yangilash, ijtimoiy obyektlarni modernizatsiya qilish va tadbirkorlikni rivojlantirishga yo‘naltiriladi.
Dastur doirasida Nurota tumanida 58 ta loyihani amalga oshirish rejalashtirilgan bo‘lib, ular iqtisodiyot, infratuzilma, qishloq xo‘jaligi va ijtimoiy sohalarni qamrab oladi.
Xususan, sanoat va xizmat ko‘rsatish yo‘nalishlaridagi loyihalar orqali 443 ta yangi ish o‘rni yaratiladi, 1,8 million dollarlik eksport hajmi shakllantiriladi.
Shuningdek, tuman markazida zamonaviy IT markazi, diagnostika tibbiy markazi hamda sayyohlar uchun dam olish maskanlari barpo etilishi rejalashtirilgan. Dastur doirasida ichki yo‘llar ta’mirlanadi, 11125 xonadon toza ichimlik suvi bilan ta’minlanishi bilan birga, 2 ta mahalla ham "Yangi O‘zbekiston qiyofasidagi mahalla”ga aylantirilishi rejalashtirilgan.
Dasturdan kutilayotgan asosiy natijalar — aholi turmush darajasini oshirish, yangi ish o‘rinlarini yaratish va mahalliy iqtisodiyotni barqaror rivojlantirishdir.