Xalqaro hamkorlikda kasb maktabi ochilishi rejalashtirilmoqda
2025-12-11 15:30:00 / Yangiliklar
Bugun Migratsiya agentligi hududiy filiali rahbari Ismat Boltayev hamda Rossiya, Boshqirdistonning “SVARTEKS” kompaniyasi vakili Marsel Asfandiyarov bilan birgalikda hamkorlikni yo'lga qo'yish bo'yicha muzokara olib borilib, viloyatimizda kasb maktabi tashkil etish bo'yicha loyihalar muhokama qilindi.
“SVARTEKS” kompaniyasi viloyatimizda "Payvandlash maktabi" tashkil etish tashabbusini ilgari surdi.
Dastlab loyiha uchun Qiziltepa tumani tanlanib, tumandagi kollej ko‘rib chiqilgan bo‘lsa, bugungi o‘rganishlar yakunida Xatirchi agrotexnikumida ham mazkur maktabni ochish imkoniyati mavjudligi aniqlandi.
Xorijiy hamkor tomonidan loyihaga 100 000 AQSh dollari miqdorida investitsiya kiritilishi rejalashtirilgan.
O‘qish muddati 2 oy davom etib, guvohnoma beriladi, tinglovchilarga razryad tayinlanadi.
Bitiruvchilar oylik ish haqi o'rtacha 2000-4500 AQSh dollarida bo'lgan Rossiyaning yirik korxonalariga ishga yo‘naltiriladi va joylashtiriladi.