Jasurbek Choriyev — TRASEKAning yangi bosh kotibi: O‘zbekiston transport integratsiyasi boshqaruvini o‘z qo‘liga olmoqda
2026-05-21 16:00:00 / Yangiliklar
O‘zbekiston Respublikasi Transport vaziri o‘rinbosari Jasurbek Choriyevning TRASEKA Bosh kotibligiga o‘z nomzodini qo‘yishdagi bosh shiori — "Koordinatsiyadan operatsion yetakchilikka" o‘tish hisoblanadi. Uning dasturi raqamli ishonch, ma’lumotlarga asoslangan boshqaruv va moliyaviy barqarorlik orqali siyosiy deklaratsiyalardan real operativ boshqaruvga o‘tishni nazarda tutadi.
Rejaning asosiy maqsadlari tezkorlik, raqamlashtirish va ishonchlilik tamoyillariga tayanadi. J.Choriyevning strategik rejalari «Transformatsiyaning yetti ustuni» va 2030-yilgacha bo‘lgan Yo‘l xaritasida aks etgan.
Huquqiy garmonizatsiya va Raqamli tranzit (I va II ustunlar) «TRASEKA kvotasi»: 14 ta a’zo davlat uchun yagona standartlar va Yevropa transport vazirlari konferensiyasi (YTVK/EKMT) ruxsatnomasining analogi bo‘lgan universal raqamli kvota tizimini joriy etish (2028-yilgacha).
E-ruxsatnoma (E-permit): E-ruxsatnoma tizimini barcha 14 ta davlatda to‘liq joriy etish.
Qog‘ozsiz tranzit: e-TIR, e-CMR va e-FBL tizimlarini BMT YEIK platformalari orqali to‘liq integratsiya qilish va elektron imzolarni o‘zaro tan olish.
Infratuzilma va moliyaviy barqarorlik (III va IV ustunlar) To‘siqlar matritsasi: Kaspiy portlari va temir yo‘l uzellaridagi eng muhim 20 ta muammoli nuqtani aniqlab, bartaraf etish.
«Yagona oyna»: Chegaralarda kutish vaqtini 30–50% ga qisqartirish.
TRASEKA jamg‘armasi: Xalqaro moliya institutlari (YETTB, OTB, Jahon banki, YI Global Gateway) bilan hamkorlikda ishni birinchi kundanoq boshlaydigan jamg‘arma tuzish.
Ishbilarmonlar kengashi: Xususiy sektorga real vakolatlar beruvchi kengashni tashkil etish.
Marshrutlar sinergiyasi va Vakolatxonalar (V ustun) : TRASEKAni raqobatchi emas, balki Yevroosiyo bog‘liqligini ta’minlovchi tashkilot sifatida Transkaspiy transport yo‘lagi, CASCA+ va O‘zbekiston–Turkmaniston–Eron–Turkiya yo‘nalishlari bilan muvofiqlashtirish, yagona tariflar va uzluksiz logistikani joriy qilish.
Monitoring va Yashil logistika (VI va VII ustunlar) TRASEKA samaradorlik indeksi (TSI): Yo‘l vaqti, narxi va ishonchliligini sun’iy yo‘ldosh ma’lumotlari orqali real vaqt rejimida ko‘rsatuvchi ochiq indeksni ishga tushirish.
Yashil koridor: YEI hamkorligida yashil yo‘laklarni sertifikatlash, Yevro-5/Yevro-6 standartlariga o‘tish va ekologik toza transport turi sifatida temir yo‘llarni rivojlantirish.
Jasurbek Choriyev o‘zining ilk nutqida ishtirokchi mamlakatlarga bildirilgan ishonch uchun minnatdorlik izhor etib, hamkorlikni yanada mustahkamlash va barcha tomonlarni tashkilot faoliyatiga jalb etish zarurligini ta’kidladi. “Ishonchim komilki, faqatgina barcha a’zo davlatlarning teng ko‘magi bilangina biz TRASEKA salohiyatini to‘liq ro‘yobga chiqara olamiz va hamkorlikni yangi bosqichga olib chiqamiz”, — deb qayd etdi Choriyev.