Bundan oldin yo‘lovchi turi va fuqaroligi bo‘yicha qo‘yilgan cheklovlar bekor qilinadi.

Saudiya Arabistoni Podshohligiga amalga oshirilayotgan parvozlarda, umra mavsumi nihoyasiga yetayotganligi va «Haj – 2026» mavsumidan oldin barcha "Umra" ziyoratchilari Saudiya Arabistoni Podshohligining amaldagi qonunchiligiga muvofiq mamlakatdan chiqib ketishi shartligini inobatga olgan holda:

“Uzbekistan Airports” AJ Saudiya Arabistoniga parvoz qilayotgan barcha turdagi yo‘lovchilarni ortga qaytish chiptasi borligini tekshirish, ortga qaytish aviachiptasiga ega bo‘lmagan yo‘lovchilar ro‘yxatini aviakompaniyalar va turoperatorlar kesimida shakllantirib har kuni ish smenalari tugashi bilan "O‘zaviatsiya" agentligidagi Shtabga kiritib borishi lozim.

Barcha rezident va xorijiy aviakompaniyalar Saudiya Arabistoniga amalga oshiriladigan parvozlarda "Umra" ziyoratchilarini tashish ishlari O‘zbekiston Respublikasi Vazirlar Mahkamasining 2024-yil 12-oktyabrdagi «Umra» tadbirlarini tashkil etish va o‘tkazish bilan bog‘liq chora-tadbirlarni yanada takomillashtirish to‘g‘risida»gi 668-son qaror talablari asosida amalga oshirilishini va "Umra" ziyoratchilarini tashish ishlarini faqatgina Diniy ishlar bo‘yicha qo‘mitadan tegishli litsenziya olgan turoperatorlar bilan amalga oshirilishini;

«Umra» ziyoratchilarini tashish bo‘yicha turoperatorlar shartnomalarda «borish va kelish parvozlari qaysi aviakompaniya tomonidan bajarilishidan qat’iy nazar har bir yo‘lovchiga alohida borish-kelish aviachiptasini topshirish majburiyatini turoperator zimmasiga yuklatilishini»;

Parvozlarda ovoz kuchaytirgich orqali yo‘lovchilarga turoperatorlar va turagentlar tomonidan «Umra» va «Tur» paketlari tarkibida yo‘lovchilarning qo‘liga borish-kelish aviachiptalari, mehmonxonalar, transferlar va ovqatlanish uchun vaucherlar, shuningdek, sug‘urta polislari nusxalari taqdim etilishi lozimligi, ushbu hujjatlarni olmagan yo‘lovchilar qo‘nganidan so‘ng o‘z turoperatorlari va turagentlari bilan bog‘lanib ushbu ma’lumotlarni talab qilishlari lozimligi, shuningdek, ortga qaytish reysiga ro‘yxatdan o‘tish uchun aviachiptada ko‘rsatilgan vaqtda aeroportga yetib kelishlarini lozimligi, doimiy ravishda o‘z turoperatorlari va turagentlari hamda ularning callarkazlari bilan aloqada bo‘lishini eslatishi;

Parvozlarni tashkil etishda parvozlar xavfsizligi talablari, xalqaro havo tashuvlari bo‘yicha amaldagi qoidalar, shuningdek Saudiya Arabistoni Qirolligi va BAAning vakolatli organlari tomonidan belgilangan talab va tartiblarga qat’iy rioya etilishi ta’minlanishi lozim.

«O‘zaviatsiya» agentligi Saudiya Arabistonidan qaytish aviachiptasi bo‘lmagan yo‘lovchilar to‘g‘risida aeroportlardan olingan ma’lumotlarni umumlashtirgan holda tahlil qilish va tegishli choralar ko‘rish uchun Din ishlari bo‘yicha qo‘mita, Turizm qo‘mitasi hamda Prokuratura organlariga kiritib borilishini ta’minlaydi. Bunda, ma’lumotlarni tahlil qilishda borish va qaytish aviachiptalari turli xil aviakompaniyalardan bo‘lgan yo‘lovchilar bo‘lishi mumkinligini inobatga olinadi.

Transport vazirligi tegishli idoralar bilan hamkorlikda vaziyatni doimiy ravishda monitoring qilib boradi hamda mintaqadagi vaziyatning o‘zgarishiga qarab qo‘shimcha ma’lumotlar va ko‘rsatmalarni hukumat bilan kelishgan holda berib boradi.