Toshkentda Markaziy Osiyo mamlakatlari transport vazirlarining uchinchi uchrashuvi bo‘lib o‘tdi
2025-11-13 14:00:00 / Yangiliklar
Uchrashuvda O‘zbekiston Respublikasi Transport vaziri I.Maxkamov, Qirg‘iz Respublikasi transport va kommunikatsiya vaziri A.Sirgabayev, Tojikiston Respublikasi transport vaziri A.Ibrohim, Qozog‘iston Respublikasi transport vaziri o‘rinbosari T.Lastayev, Turkmaniston Respublikasining O‘zbekistondagi Favqulodda va muxtor elchisi Sh.Meredov hamda Ozarbayjon Respublikasi transport va raqamli rivojlanish vaziri o‘rinbosari J.Gurbanov ishtirok etishdi.
Uchrashuv ishtirokchilari hozirgi global geosiyosiy beqarorlik, savdo va transport-logistika zanjirlarining uzilishi, oziq-ovqat xavfsizligi muammolarining keskinlashuvi sharoitida o‘zaro hamkorlikning dolzarbligi sezilarli darajada oshib borayotganligini alohida ta’kidlab o‘tishdi.
Bunday sharoitda hamkorlikning yangi yo‘llari va mexanizmlarini izlash, umumiy va o‘zaro manfaatli maqsad va vazifalarni ilgari surish bo‘yicha birgalikdagi ishlarni yanada kuchaytirish muhimligi qayd etildi.
Uchrashuvda transport vaziri I.Maxkamov Markaziy Osiyo mamlakatlari hamkorligining 2035-yilgacha bo‘lgan strategik yo‘nalishlarini belgilab beruvchi "CATRANS – 2035" hujjati loyihasiga alohida to‘xtalib o‘tdi.
Ushbu hujjat xalqaro savdo-logistika zanjirlariga integratsiyalashgan yagona, samarali, raqamli va ekologik transport makonini yaratishga qaratilgan.
Hujjat loyihasi uchta asosiy yo‘nalishni o‘z ichiga oladi - infratuzilmani modernizatsiya qilish, raqamli transformatsiya va institutsional muvofiqlashtirish.
CATRANS-2035 strategiyasini amalga oshirish natijasida Markaziy Osiyoning transport integratsiyasining yangi bosqichi uchun mustahkam poydevor yaratilib, mintaqamiz Yevrosiyoning asosiy logistika markazlaridan biriga aylanishiga xizmat qiladi.
Vazir I.Maxkamov mazkur hujjatni kelishish jarayonini yakunlashni va uni transport vazirlarining keyingi yig‘ilishida imzolashni hamda ko‘zda tutilgan tashabbuslarni ro‘yobga chiqarish bo‘yicha "Yo‘l xaritasi"ni tayyorlashni taklif etdi.
Yig‘ilish ishtirokchilari Markaziy Osiyoning ishonchli sherik sifatidagi mavqeini mustahkamlaydigan transport yo‘laklarini rivojlantirishga qaratilgan sa’y-harakatlarni qo‘llab-quvvatladilar.
Markaziy Osiyo mamlakatlari transport vazirlarining uchinchi uchrashuvi yakunida Toshkent kommyunikesi imzolandi.