O‘zbekiston Respublikasi Investitsiyalar, sanoat va savdo vazirligi

O‘zbekiston Vengriya bilan strategik sheriklikni faol rivojlantirishni davom ettirmoqda, bunda savdo-iqtisodiy va investitsiyaviy hamkorlikni kengaytirishga alohida e’tibor qaratilmoqda. Bu yo‘nalishdagi navbatdagi muhim qadam – Toshkent viloyatining Ohangaron tumanida joylashgan yangi “O‘zbekiston–Vengriya” Maxsus sanoat zonasi (MSZ) hududida Vengriya va Yevropa investorlariga qo‘shimcha imtiyoz va preferensiyalar taqdim etishni nazarda tutuvchi O‘zbekiston Respublikasi Prezidentining Qarorini qabul qilish bo‘ldi.

Hamkorlikning huquqiy va institutsional asosi
Ikki davlat o‘rtasidagi hamkorlik 64 ta ikki tomonlama hujjat asosida amalga oshirilmoqda. Ular orasida investitsiyalarni rag‘batlantirish va o‘zaro himoya qilish, ikki tomonlama soliqqa tortishni oldini olish to‘g‘risidagi bitimlar, shuningdek, O‘zbekiston va Yevropa Ittifoqi o‘rtasidagi Hamkorlik to‘g‘risidagi amaldagi bitim mavjud bo‘lib, u eng qulay savdo rejimini taqdim etadi.

Hukumatlararo iqtisodiy hamkorlik bo‘yicha qo‘shma komissiya doirasida farmatsevtika, qishloq xo‘jaligi, mashinasozlik va mehmonxona biznesi sohalarida bir qator strategik loyihalar amalga oshirilmoqda. Muhim loyihalar qatorida Vengriyaning OTP Bank tomonidan “Ipoteka bank”ning xususiylashtirilishi va parrandachilik klasterlarining ishga tushirilishi kiritilgan.

Yangi qaror nimalarni nazarda tutadi
Prezident Qarori Vengriya biznesi uchun O‘zbekistonda maksimal qulay sharoitlar yaratishga qaratilgan. Asosiy imtiyozlar quyidagilarni o‘z ichiga oladi:

• “Maxsus iqtisodiy zonalar to‘g‘risida”gi Qonunga muvofiq 10 yil muddatga soliq imtiyozlari;

• Investorlarni joylashtirishda boshqaruvchi kompaniyaga mustaqillik;

• MSZ hududini tashqi infratuzilma bilan ta’minlash bo‘yicha davlat kafolati.

Qaror bilan O‘zbekiston Respublikasi va Vengriyaning “Inpark” kompaniyasi o‘rtasida imzolangan Investitsiya bitimi tasdiqlandi.

Shuningdek, O‘zbekiston Respublikasi Bosh vaziri raisligida maxsus sanoat zonasida muhandislik, kommunikatsiya va yo‘l-transport infratuzilmasini qurish loyihalarini o‘z vaqtida amalga oshirishni ta’minlaydigan Ma’muriy kengash tashkil etildi.

Kutilayotgan natijalar
Mazkur chora-tadbirlar to‘g‘ridan-to‘g‘ri xorijiy investitsiyalarni jalb etish, sanoat kooperatsiyasini jadallashtirish, eksport hajmini oshirish va yangi ish o‘rinlarini yaratishga xizmat qiladi. Bundan tashqari, farmatsevtika, agrar soha va yuqori texnologiyali tarmoqlarda ishlab chiqarish salohiyatining o‘sishi kutilmoqda.

“O‘zbekiston–Vengriya” Maxsus sanoat zonasi O‘zbekiston va Vengriya o‘rtasidagi iqtisodiy hamkorlikning flagmani bo‘lishi, shuningdek, O‘zbekistonning ochiq investitsiya siyosati va barqaror biznes muhiti yaratishga tayyorligini namoyon etishi kutilmoqda.