O‘zbekiston Respublikasi Investitsiyalar, sanoat va savdo vazirligi

Joriy yilning 16-iyun kuni Toshkent shahrida O‘zbekiston Respublikasi investitsiyalar, sanoat va savdo vaziri Laziz Kudratov Osiyo taraqqiyot banki (OTB) vitse-prezidenti Bhargav Dasgupta bilan uchrashdi.

Uchrashuvda O‘zbekiston va OTB o‘rtasidagi 30 yillik strategik hamkorlik natijalari hamda istiqbollari muhokama qilindi. Xususan, “yashil” iqtisodiyotga o‘tish, xususiy sektorni rivojlantirish, inson kapitalini mustahkamlash va moliyaviy bozorlarni modernizatsiya qilish sohalaridagi loyihalarga alohida e’tibor qaratildi.

2025-yilga mo‘ljallangan qo‘shma tashabbuslar ko‘rib chiqildi, jumladan: suveren bo‘lmagan moliyalashtirish hajmini kengaytirish, davlat-xususiy sheriklik (DXSh) loyihalarini rivojlantirish, ekologik sanoat zonalari va innovatsion ishlab chiqarish quvvatlarini yaratish, eksportni qo‘llab-quvvatlash choralari.

Tomonlar, shuningdek, kichik biznesni qo‘llab-quvvatlash bo‘yicha amalga oshirilayotgan qo‘shma dastur doirasidagi ishlarni alohida ko‘rib chiqdilar.

Uchrashuv yakunida tomonlar hamkorlikni chuqurlashtirish va O‘zbekistonda loyihalarni amalga oshirishda OTBning bozor mexanizmlariga asoslangan yondashuvlarini qo‘llab-quvvatlashga tayyor ekanliklarini tasdiqladilar.