O‘zbekiston Respublikasi Investitsiyalar, sanoat va savdo vazirligi

Aholi sonining, ayniqsa yosh va ma’lumotli fuqarolar ulushining jadal o‘sishi bilan, zamonaviy va qulay shahar muhitini yaratishga alohida e’tibor qaratilmoqda. Urbanizatsiya jarayonlarining tezlashuvi va infratuzilmaning rivojlanishi innovatsion qurilish texnologiyalarini joriy etish hamda sifat standartlarini oshirish uchun keng imkoniyatlar yaratmoqda. Shu nuqtai nazardan xalqaro hamkorlik uzoq muddatli ijtimoiy-iqtisodiy taraqqiyot va modernizatsiyani qo‘llab-quvvatlaydigan barqaror yechimlarni ilgari surishda hal qiluvchi ahamiyat kasb etadi.

O‘zbekiston Respublikasi Investitsiyalar, sanoat va savdo vazirligi tomonidan tashkil etilgan Toshkent xalqaro investitsiya forumi doirasida 12-iyun kuni bo‘lib o‘tgan «Shaharsozlik va qurilish: barqaror va qulay rivojlanish uchun infratuzilmani modernizatsiya qilish» mavzusidagi panel sessiyasi aynan shu masalalarga bag‘ishlandi.

«Boston Consulting Group» (BCG) hamkori va direktori Hussam Rauf moderatorlik qilgan sessiyada shaharsozlik va qurilish sohasida modernizatsiya va barqaror rivojlanish bo‘yicha tashabbuslar, shuningdek, infratuzilmani yangilash va barqaror ijtimoiy-iqtisodiy o‘sishni ta’minlash orqali aholi turmush sharoitlarini yaxshilash choralari muhokama qilindi.

Tadbirda nutq so‘zlaganlar:

• Sasha Parne, Alstom kompaniyasining savdo va marketing bo‘yicha vitse-prezidenti
• Manuela Gatto, Zaha Hadid Architects direktori
• Hakan Jeyhan Agcha, Cross Works (Yangi Toshkent bosh rejasi va me’moriy ko‘rsatmalar) asoschisi va boshqaruvchi direktori
• Varun Deyv, Synergy Consulting kompaniyasining direktori yordamchisi
• Maksim Popov, Anhor Evolution Ltd kompaniyasining biznesni rivojlantirish bo‘yicha bosh direktori (CBDO).

• Izzat Gormez, «KOC Construction» kompaniyasining loyihalarni rivojlantirish va investitsiyalar bo‘yicha katta Rahbari

Hussam Rauf shaharsozlikning rivojlanishi masalalariga to‘xtalib o‘tarkan, shunday dedi: “2050-yilga borib, global aholi sonining uchdan ikki qismi shaharlarda yashaydi. Ushbu shaharlar global iqtisodiy rivojlanishning 90 foizidan ortig‘iga mezbonlik qiladi. Biroq, bu o‘sish bir xil kechmaydi – asosiy o‘sish Osiyo va Afrika atrofida jamlanadi. 37,6 millionlik aholisi bilan O‘zbekiston Markaziy Osiyodagi eng zich aholi yashaydigan davlatga aylandi. Endi esa savol tug‘iladi: bu o‘sish infratuzilma, ijtimoiy inklyuziya va shaharsozlikka qanday bosim o‘tkazadi?” - dedi Hussam Rauf. Uning qayd etishicha “Shaharlar bugun inklyuzivlik, yaqinlik tamoyiliga asoslanishi kerak. Masalan, 15 daqiqalik shahar konsepsiyasi – bu har bir xizmat aholiga yaqin bo‘lishini ta’minlab, harakatlanishga ehtiyojni kamaytiradi va teng imkoniyat yaratadi”.

CrossWorks kompaniyasi asoschisi va bosh direktori Hakan Jeyhan Agcha Yangi Toshkent loyihasi haqida gapirib o‘tdi: “Yangi Toshkent loyihasi shunchaki navbatdagi shaharsozlik rejasi emas - biz bu yondashuv orqali butun Markaziy Osiyoda shahar barpo etishning yangi mezonini belgilashni maqsad qilganmiz. Loyiha 25 000 gektar maydonni egallaydi. Shu hududning 25 foizidan ortig‘i ochiq maydonlarga ajratiladi. Aholi zichligi har gektariga 100 kishi atrofida bo‘ladi. Yangi Toshkent tabiat manzarasiga uyg‘un bo‘lishi kerak. Shuning uchun biz Chirchiq va Qorasuv daryolarini bog‘lovchi vodiy va kanallar tarmog‘ini loyihaladik. Bu tizim tabiiy relyefdan foydalanib, suvni gravitatsiya orqali oqizadi  - Amsterdam yoki Kopengagenga o‘xshash yashil va barqaror shahar modeli shakllanadi”.

Alstom kompaniyasining savdo va marketing bo‘yicha vitse-prezidenti Sasha Parnening jamoat transportining rivojlanishi qanchalik muhimligni alohida ta’kidladi: “Agar ikki million odamning har biri mashina haydasa, bunday shahar barqaror bo‘la olmaydi. Shuning uchun ko‘plab shaharlar avtomobildan metro va tramvay kabi jamoat transportiga o‘tmqoda”, dedi u.

Panelda ishtirok etgan mutaxassislar innovatsion qurilish texnologiyalarini joriy etish, infratuzilmani modernizatsiya qilish va aholining turmush sharoitlarini yaxshilash borasida amalga oshirilayotgan sa’y-harakatlarni alohida qayd etib o‘tishdi.