O‘zbekiston Respublikasi Investitsiyalar, sanoat va savdo vazirligi

Toshkent xalqaro investitsiya forumining ikkinchi kuni ham ishtirokchilarning diqqat markazida bo‘ldi. «ACWA Power», «Bell Engineering Software Technologists», «HYPER Partners», «Shaanxi Road And Bridge Group», «TK-CH GROUP» va Uz Oman Capital kabi bir qancha xorijiy kompaniyalar bilan 30 dan ortiq investitsiya shartnomalari imzolandi.

Kelishuvga erishilgan asosiy bitimlardan biri O‘zbekiston Respubikasi tiklanish va taraqqiyot jamg‘armasi va Uz Oman Capital o‘rtasida Markaziy Osiyo to‘g‘ridan-to‘g‘ri investisiyalar jamg‘armasini tashkillashtirish bo‘yicha anglashuv memorandumi imzolanishi bo‘ldi. Bundan tashqari:

• Quyosh elektr stansiyasi va energiya saqlash tizimlarini qurish loyihasi bo‘yicha  amalga oshirish bitimi;

• Toshkent viloyatida quvvati 1400 MVt bo‘lgan issiqlik elektr stansiyasini qurish loyihasini amalga oshirish bitimi;

• Yer osti kaverna omborlarini o‘zlashtirish, yoshlar uchun ta’lim tashkil etish, tibbiy, xavfli va agro chiqindilarni qayta ishlash zavodi qurish, bambuk yetishtirish va qayroqtosh oltin konilarini o‘zlashtirish va rivojlantirish bo‘yicha hamkorlik qilish bitimi;

• Farg‘ona viloyatining Beshariq tumanida quvvati 500 MVt bo‘lgan quyosh fotoelektr stansiyasini qurish va Namangan viloyatining Pop tumanida quvvati 200 MVt bo‘lgan quyosh fotoelektr stansiyasini qurish bo‘yicha investitsiya va elektr energiyasini sotib olish bitimi;

• Surxondaryo va Qashqadaryo viloyatlarini bog‘lovchi Sariosiyo tumani «Bog‘cha» aholi punktidan Shahrisabz tumani «Kamar» qishlog‘iga olib boruvchi yangi pullik avtomobil yo‘lini qurish bo‘yicha DXSH mexanizmi asosida loyiha hujjatlarini tayyorlash to‘g‘risida bitim;

• Konsentrlangan quyosh energiyasi stansiyasini qurish loyihasini  amalga oshirish bitimi;

• Yangi Namangan shaharchasi hududida zamonaviy ko‘p qavatli uy-joylar va ofislar tashkil etish bo‘yicha hamkorlik kelishuvi;

• Navoiy IES – Yoshlik podstansiyasini bog‘lovchi 400 km uzunlikdagi elektr uzatish tarmog‘i va yangi podstansiya qurish loyihasini  amalga oshirish bitimi;

• Kichik GES qurish loyihasini  tashkil etish anglashuv memorandumi

• Xavfli chiqindilarni qayta ishlash orqali elektr energiyasini ishlab chiqarishni  amalga oshirish bitimi;

Bundan tashqari O‘zbekistonda sanoat, energetika, farmasevtika, qishloq xo‘jaligi va boshqa sohalarni rivojlantirishga o‘z hissasini qo‘shishi kutilgan yana bir qancha shartnomalar imzolandi.

Mahalliy va xorijiy hamkorlar imzolangan shartnomalar kelgusida investitsiyaviy aloqalarni rivojlantirishga xizmat qilishini bir ovozdan ma’qulladi. Mutaxassislar bunday kelishuvlar nafaqat ishbilarmonlik muhitini yaxshilash, balki xalqaro miqyosda ham yangi imkoniyatlar yaratishini ta’kidladi.