O‘zbekiston Respublikasi Investitsiyalar, sanoat va savdo vazirligi

Toshkent Xalqaro Investitsiya Forumining uchinchi kuni doirasida “TBC’ning O‘zbekistonda onlayn bank xizmatlarini shakllantirayotgan bozor islohotchisi sifatidagi yo‘li” mavzusida individual sessiya bo‘lib o‘tdi. Unda TBC bankining erta bosqichdagi investitsiyalardan tortib, bozorga yangicha yondashuv va innovatsiyalar orqali sezilarli ta’sir ko‘rsatgan bosqichlariga qadar bo‘lgan yo‘li muhokama qilindi.

Sessiyaga O‘zbekiston Respublikasi Prezidentining maslahatchisi apparati huzuridagi kommunikatsiyalar bo‘yicha konsultant Jonathan Charles moderatorlik qildi. Muloqot davomida TBC’ning tezkor o‘sishini ta’minlagan tartibga soluvchi omillar, shuningdek, investorlarning bu jarayonga qo‘shgan hissasi yoritildi.

Spiker sifatida TBC Bank Group PLC’ning xalqaro biznes bo‘yicha rahbari Oliver Hyuz ishtirok etdi.

“TBC uchun Gruziya biroz kichkina davlat edi. Shu sababli biz qanday qilib kengayish haqida o‘ylashni boshladik. Shunda Gruziyaga nisbatan o‘xshab ketadigan O‘zbekiston varianti paydo bo‘ldi. 2019 yilda biz bu yerga kirib kelishga qaror qildik. Keyinchalik payme’ni avval qisman, so‘ngra to‘liq sotib olishga muvaffaq bo‘ldik”, - deya so‘zlarini boshladi spiker.

TBC Digital’da hozirda 20 million nafarga yaqin ro‘yxatdan o‘tgan foydalanuvchilar bor bo‘lib, bu Gruziya aholisidan bir necha barobar ko‘pdir. Oylik faol foydalanuvchilar soni esa 6 million nafarga yetgan.

“2024 yilda 41 mln dollar foyda oldik. Biz faoliyatimizni yo‘lga qo‘ygandan so‘ng qisqa fursat ichida foydaga chiqib, dunyoda fintexlar orasida rekord natija qayd etganmiz. Biznesda xorijiy kompaniya sifatida muvaffaqiyatga erishish uchun albatta mahalliylashish va bozorni chuqur o‘rganish kerak bo‘ladi. Biz ham boshida bir nechta xatolar qilganmiz, qiyinchiliklardan o‘tganmiz”, - deydi Oliver Hyuz.

TBC Bank Group vakili O‘zbekiston mehmondo‘st va iste’dodli kadrlarga to‘la mamlakat ekanini alohida ta‘kidladi. Oliver Hyuz mamlakatdagi ochiq bank tizimini ham maqtab o‘tdi:

“Ko‘p hollarda O‘zbekistondagi bank tizimi rivojlanish darajasi bo‘yicha ayrim Yevropa davlatlaridan ham oldinda turadi. Bu raqamli o‘yinchilar uchun navbatdagi jozibador tomonlardan biridir”

Spiker o‘z nutqida TBC kompaniyasining sun’iy intellekt (SI) bo‘yicha qilayotgan ishlari bilan ham yaqindan tanishtirdi. Kompaniya allaqachon SI loyihalariga 10 mln dollar sarmoya qilishga ulgurgan:

“SI loyihalarini yaratish juda qiyin va qimmat turadi. Endigina 10 million dollar investitsiya qilgan bo‘lsak, hali yana ko‘plab sarmoya jalb qilishimiz kerak. Aholining muloqot qilish uslubi murakkabligi, shevalar, so‘zlashuvda rus tilidan o‘zbek tiliga, o‘zbek tilidan rus tiliga doimiy ko‘chishlar va ikki xil alifbo sababli sun’iy intellektni bunga o‘rgatishga ko‘proq vaqt kerak. Mukammal gapiruvchi texnologiya yaratmasak, mijozlar bilan doimiy muloqot qilishning imkoni yo‘q”

Oliver Hyuz yaqin oylarda TBC LLM (Large Language Model) asosida ilovani taqdim qilishini aytib, bu yangi avlod bank tizimiga yo‘l ochishini ta’kidladi.

Sessiya davomida O‘zbekistonda shakllanayotgan fintex ekotizimi haqida kengroq tasavvur berildi. Shu bilan birga, raqamli moliyaviy xizmatlarni kengaytirish, texnologik innovatsiyalarni joriy etish va bozorda raqobatni kuchaytirish borasidagi istiqbollar atroflicha tahlil qilindi.

Sessiyada TBC Bank’ning bozordagi yetakchi o‘rni, innovatsion onlayn banking yondashuvlari va mintaqada investitsion muhitni yaxshilashdagi o‘rni alohida e’tirof etildi.