O‘zbekiston Respublikasi Investitsiyalar, sanoat va savdo vazirligi

Toshkent xalqaro investitsiya forumining uchinchi kuni doirasida o‘tkazilgan sessiyada uzoq tarix va boy madaniy merosga ega jahonda tan olingan brendlarning mamlakat investitsion qiyofasini shakllantirishdagi strategik roli muhokama qilindi. Qayd etish joizki, tadbir O‘zbekiston Respublikasi Investitsiyalar, sanoat va savdo vazirligi muvofiqlashtiruvi ostida tashkil etildi.

“LVMH Moët Hennessy Louis Vuitton SE”ning chakana savdo bo‘yicha vitse-prezidenti Bertran Stella-Burdiyon dunyoning eng mashhur brendlaridan biri hisoblangan Louis Vuitton’ning tarixi haqida ilhomlantiruvchi ma’ruza qilib, brendning paydo bo‘lishi haqidagi qiziqarli faktlar bilan o‘rtoqlashdi.

Stella-Burdiyon 1930-yilda Louis Vuitton’ning Parijdan Pekinga O‘zbekiston orqali o‘tgan tarixiy ekspeditsiyasiga alohida ta’kidlarkan, O‘zbekiston o‘sha paytlardayoq brend ruhining markazida bo‘lganini qayd etdi. Yakunda u “Hashamat har doim tarix bilan bog‘lanadi” der ekan, aynan noyob o‘tmish brendni butun dunyo ko‘z o‘ngida chinakam ahamiyatli va jozibador qilishini ta’kidladi.

Sessiya davomida mashhur brendlarning xalqaro nufuzi orqali davlat imijini oshirish, mamlakatga to‘g‘ridan-to‘g‘ri xorijiy investitsiyalar va sayyohlik oqimlarini jalb qilish, innovatsiyalarga asoslangan barqaror o‘sishni qo‘llab-quvvatlash imkoniyatlari ham ko‘rib chiqildi.

Bertran Stella-Burdiyonning qo‘shimcha qilishicha, zamonaviy dunyoda hashamat yanada moslashuvchan bo‘lib, ixchamlashib bormoqda: ishlab chiqarish Osiyoda yoki boshqa mintaqalarda bo‘lishidan qat’i nazar, tarqatish hamkorlik orqali amalga oshirilishi mumkin. Litsenziya asosida ishlash esa brend tanilishini kengaytirish imkonini beradi. Soatlar, parfyumeriya va optika bugungi kunda ham litsenziyalash uchun eng mashhur yo‘nalishlar bo‘lib qolmoqda. Uning so‘zlariga ko‘ra, har bir asosiy savdo markazida global hashamatli brendlarning mavjudligi shunchaki strategiya emas, balki o‘zgarmas asosdir.