O‘zbekiston Respublikasi Investitsiyalar, sanoat va savdo vazirligi

2025-yilgi Toshkent xalqaro investitsiya forumining ikkinchi kunida “Platformali bandlik investorlar muvaffaqiyatining asosiy omili sifatida: samarali kadrlar siyosati” mavzusida panel sessiyasi o‘tkazildi. Tadbir davomida raqamli iqtisodiyot va mehnat bozoridagi o‘zgarishlar fonida bandlikning platforma modelining ahamiyati, shuningdek, investorlar uchun yaratilayotgan imkoniyatlar muhokama etildi.

Tadbirga Yandex Go kompaniyasining platformali bandlik va haydovchilar bilan hamkorlik bo‘yicha direktori Natalya Moskvitina moderatorlik qildi. U raqamli platformalarning muhimligini ta’kidlab, shunday dedi: “Bugungi kunda raqamli platformalar, ayniqsa xizmat ko‘rsatish sohasida, dunyodagi eng tez rivojlanayotgan ekotizimlardan biriga aylanmoqda. Hozirda jahon bozorida 7000 dan ortiq platforma mavjud. Shuni unutmangki, birorta ham platforma odamlarsiz ishlay olmaydi. Algoritmlar va ilovalarning o‘rni muhim, ammo ularning ortida millionlab ijrochilar turadi”.

Sessiya davomida quyidagi ekspertlar so‘zga chiqdilar:

• Dmitriy Volvach, Rossiya Federatsiyasi Iqtisodiy rivojlanish vazirining o‘rinbosari

• Izzat Shukurov, Yandex Uzbekistan bosh direktori

• Oksana Sinyavskaya, Ijtimoiy siyosat instituti direktor o‘rinbosari

• Alisher Elmurodov, raqamli transformatsiya bo‘yicha maslahatchi

Dmitriy Volvach bandlik kelajagi haqidagi o‘z fikrlari bilan o‘rtoqlashdi: “Oksana Vyacheslavovna to‘g‘ri ta’kidlaganidek, platformali bandlik - bu yangi ko‘nikmalar emas, balki o‘z mehnatini erkin tasarruf etish imkoniyatidir. Bu insonlarga moslashuvchan bo‘lish va ushbu erkinlikni ro‘yobga chiqarish uchun texnologik yangiliklardan foydalanish imkonini beradi”.

O‘zbekistonda platformali bandlikni rivojlantirish

Alisher Elmurodov bugungi kunda O‘zbekistonda 5 milliondan ortiq o‘zini o‘zi band qilgan shaxslar ro‘yxatga olinganini, ularning 66 foizi so‘nggi bir yil ichida ro‘yxatdan o‘tganini ta’kidladi. U shunday dedi: “Platformali bandlik - faol rivojlanayotgan bandlik shaklidir. U odamlarga moslashuvchan ish jadvali asosida ishlash va tegishli kafolatlar olish imkoniyatini berish orqali ularning hayot sifatini yaxshilashga yordam beradi”.

Shuningdek, platformali bandlik jarayoniga ijtimoiy himoyalanmagan aholi guruhlarini qanday jalb qilish mumkinligi masalalariga ham alohida urg‘u berildi. Usmon Sharifxo‘jayev shunday qo‘shimcha qildi: “Bu an’anaviy mehnat faoliyatiga to‘liq jalb qilinishi qiyin bo‘lgan odamlar, masalan, talabalar yoki imkoniyati cheklangan shaxslar uchun moslashuvchan mehnat sharoitlarini yaratish imkoniyatidir”.

Sessiya davomida, shuningdek, platformali bandlikning huquqiy-me’yoriy asoslari, mehnat munosabatlaridagi yangicha yondashuvlar va kadrlar salohiyatini mahsuldor taqsimlash orqali korxonalar unumdorligini oshirish usullari muhokama etildi.

Mazkur sessiya O‘zbekistonning raqamli iqtisodiyotni rivojlantirish, bandlik sohasiga zamonaviy yechimlarni tatbiq etish va chet el investorlari uchun qulay sharoit yaratish yo‘lidagi izchil harakatlarining yana bir namunasi bo‘ldi.