O‘zbekiston Respublikasi Investitsiyalar, sanoat va savdo vazirligi

Investitsiyalar, sanoat va savdo vazirligi muvofiqlashtiruvi ostida Toshkent Xalqaro Investitsiya Forumining o‘tkazilmoqda. 11-iyun kungi dasturda “Uzum tajribasi: Elektron bank xizmatlarini O‘zbekiston chakana bozoriga olib kirish” mavzusida individual sessiya tashkil etildi.

O‘zbekiston Respublikasi Prezidenti maslahatchisi devonining kommunikatsiyalar bo‘yicha maslahatchisi Jonatan Charlz moderatorlik qilgan tadbirda O‘zbekistonda bank sektorida olib borilayotgan islohotlar va hukumatning raqamli moliyaviy xizmatlarni keng joriy etish bo‘yicha strategik qarashlari muhokama qilindi.

Tadbirda Uzum kompaniyasining asoschisi va bosh direktori Jasur Jumayev ishtirok etdi va raqamli yechimlar orqali foydalanuvchi tajribasini qanday soddalashtirish, chakana bozordagi bo‘shliqlarni qanday to‘ldirish haqida qarashlari bilan bo‘lishdi.

“Uzum kompaniyasi faqat elektron tijorat bilan shug‘ullanmaydi, balki butun boshli ekotizim hisoblanadi”, - deya so‘zlarini boshladi Uzum rahbari. Yetakchi elektron tijorat platfromasi bo‘lmish Uzum Market, raqamli Uzum Bank va mamlakatdagi eng yirik an’anaviy banklardan biri Kapitalbank, fintex xizmatlarini taqdim qiluvchi Uzum Nasiya va yetkazib berish xizmati Uzum Tezkor ekotizimning tarkibiga kiradi.

Uzum ekotizmi ayni vaqtda 17 million nafarga yaqin oylik foydalanuvchilarga ega. Uzum yaqinda O‘zbekistondagi birinchi “yakkashoh” - bozor qiymati 1 mlrd dollardan oshgan xususiy kompaniyaga aylandi. Ayni vaqtda ekotizimda 11 ming nafardan ortiq xodimlar faoliyat olib bormoqda va kompaniya mamlakatdagi eng yirik soliq to‘lovchilardan biriga aylangan.

Jasur Jumayev muvaffaqiyatli biznesli yaratishda jamoaning ahamiyati juda muhim ekanini ta‘kidladi. “Men ishga menejerlarni yollamayman, balki tadbirkorlarni sheriklikka taklif qilaman”, - deydi u.

Hozirgi paytda Uzum O‘zbekiston bo‘ylab 400 dan oshiq shaharlarda minglab olib ketish punktlariga ega. Kompaniyaga tegishli omborxona Markaziy Osiyodagi eng yirik omborxona hisoblanadi.

Bundan tashqari Uzum rahbari yillar davomida investorlar bilan uchrashuvlar haqida ham gapirib o‘tdi:

“Investorlar biz haqimizda turli xil narsalarni gapiradi. Bizga yaqinroqlari shunchaki Markaziy Osiyo davlati deb qarasa, ayrim uzuqroq G‘arb investorlari oddiy “Istan” davlatlarida biri deb, Afg‘oniston va Tojikiston bilan adashtiradi. Biroq bir nechta uchrashuv va tanishtiruvlardan keyin ularning fikri butunlay o‘zgarib, O‘zbekistonga mintaqadagi eng yorqin davlatlardan biri sifatida qaray boshlaydi”,  - deydi Jasur Jumayev.

Ishtirokchilar tomonidan mazkur sessiya O‘zbekistonda innovatsion texnologiyalar asosida moliyaviy xizmatlarni kengaytirish, chakana bozorda samaradorlikni oshirish hamda investitsiyalar uchun zamonaviy infratuzilma yaratish yo‘lida muhim qadam sifatida qayd etildi. Bu O‘zbekistonning ochiqligi, texnologik taraqqiyotga intilishi va investorlarga qulay raqamli ekotizim yaratish istagini yana bir bor tasdiqladi.