O‘zbekiston Respublikasi Investitsiyalar, sanoat va savdo vazirligi

5-may kuni Toshkent shahrida O‘zbekiston Respublikasi va Slovakiya Respublikasi o‘rtasidagi Hukumatlararo Iqtisodiy Hamkorlik Komissiyasining birinchi yig‘ilishi bo‘lib o‘tdi.

Yig‘ilishga Slovakiya Respublikasi Iqtisodiyot vaziri o‘rinbosari Vladimir Shimonek va O‘zbekiston Respublikasi Investitsiyalar, sanoat va savdo vaziri o‘rinbosari Shohrux G‘ulomov raislik qildi.

Tomonlar o‘zaro hamkorlikni mustahkamlash va rivojlantirishga qaratilgan keng ko‘lamli masalalarni muhokama qildilar. Savdo-iqtisodiy hamkorlik alohida eʼtibor markazida bo‘ldi. O‘zaro tovar ayirboshlash hajmida o‘sish qayd etildi va tomonlar energetika, farmatsevtika, qishloq xo‘jaligi, raqamli texnologiyalar va boshqa sohalardagi savdoni kengaytirishga bo‘lgan qiziqishlarini tasdiqladilar.

Qo‘shma ko‘rgazmalar, forumlar va biznes-missiyalarni tashkil etish, Slovakiya Eksport banki orqali eksport operatsiyalarini moliyalashtirish mexanizmlaridan foydalanish hamda imtiyozli kreditlashni joriy etish yuzasidan kelishib olindi.

Yig‘ilishda energetika va qayta tiklanuvchi energiya manbalari, qishloq xo‘jaligi, shu jumladan, geologiya-qidiruv ishlari, kamyob va noyob yer minerallarini qazib olish va qayta ishlashni o‘z ichiga olgan muhim xomashyo materiallari sohalarida hamkorlikni rivojlantirish istiqbollari ko‘rib chiqildi.

Transport va avtomobilsozlik sohasida, xalqaro transport koridorlarini rivojlantirish, raqamlashtirish, moliya va soliq sohasi, mehnat migratsiyasi, tibbiy va sog‘lomlashtirish turizmi, standartlashtirish, metrologiya, gidrometeorologiya hamda boshqa texnik va ilmiy yo‘nalishlardagi hamkorlikni kuchaytirish bo‘yicha tashabbuslar qo‘llab-quvvatlashga kelishildi.

Yig‘ilish yakunida erishilgan kelishuvlarni o‘z ichiga olgan yakuniy bayonnoma imzolandi va Komissiyaning navbatdagi yig‘ilishi Bratislavada o‘tkazilishi bo‘yicha chora-tadbirlar kelishib olindi.