O‘zbekiston Respublikasi Investitsiyalar, sanoat va savdo vazirligi

Vazir Laziz Kudratov boshchiligidagi Investitsiyalar, sanoat va savdo vazirligi delegatsiyasi AQShda bo‘lib, yirik kompaniyalar, korporatsiyalar va sanoat birlashmalari rahbarlari bilan uchrashuv va muzokaralar o‘tkazmoqda.

Tashrif dasturiga muvofiq, 7 aprel kuni tog‘-kon sanoati, mehmonxona biznesi va oziq-ovqat sanoati sohasida faoliyat yurituvchi korxonalar bilan uchrashuvlar o‘tkazildi.

Kompaniyalarga samarali investitsiya takliflari va O‘zbekistonda biznesni olib borish uchun yaratilgan shart-sharoitlar taqdim etildi. Uchrashilgan kompaniyalar rahbarlari O‘zbekistonda amalga oshirilayotgan islohotlarga yuqori baho berib, Amerika kompaniyalarining mamlakatimizda ko‘p yillik tajribaga ega bo‘lgan muvaffaqiyatli faoliyatidan kelib chiqib, hamkorlikni rivojlantirishga tayyor ekanliklarini bildirdilar.

Uchrashuvlar yakunlari bo‘yicha foydali qazilmalar sohasida hamkorlik to‘g‘risida kelishuvlar imzolandi hamda foydali qazilma konlarini qidirish va qazib olishga investitsiyalar kiritish, yuqori darajada maydalash komplekslarini (HPGR) qurish, innovatsion texnologiyalarni jalb etish va muhim xomashyo uchun qo‘shilgan qiymat yaratish, o‘zbekistonlik mutaxassislarning malakasini oshirish bo‘yicha kelishuvlarga erishildi.

Turizm sohasida yangi loyihalar – mehmonxonalar qurishni amalga oshirish muddatlari ham kelishib olindi.

Erishilgan kelishuvlar tegishli bitimlar bilan mustahkamlandi. Har bir loyihaga mas'ul loyiha menejeri tayinlandi.

ISSV delegatsiyasi AQShda oʻz faoliyatini davom ettirmoqda.