O‘zbekiston delegatsiyasi Londonda iqtisodiy hamkorlikni chuqurlashtirish bo'yicha kelishuvlarga erishdi
2025-03-29 19:00:00 / Yangiliklar
O‘zbekiston Respublikasi Investitsiyalar, sanoat va savdo vaziri Laziz Kudratov boshchiligidagi delegatsiya London shahrida Buyuk Britaniya biznesi vakillari bilan Qo‘shma iqtisodiy qo‘mitasining 1-yig‘ilishi, “O‘zbekistonning investitsiya salohiyati kunlari”da ishtirok etdi hamda Britaniyaning yetakchi kompaniyalari rahbarlari bilan ikki tomonlama uchrashuvlar o‘tkazdi.
Iqtisodiy qo‘mita yig‘ilishida bank-moliya sektori, transport, alohida muhim foydali qazilmalarni qazib olish, axborot texnologiyalari va infratuzilma kabi sohalarda kelishuvlarga erishildi.
Uchrashuv yakunida MIIT va Buyuk Britaniya Xizmatlar, kichik biznes va eksport departamenti o‘rtasida Iqtisodiy hamkorlikni chuqurlashtirish bo‘yicha Harakatlar rejasi, shuningdek, foydali qazilmalar sohasida hamkorlik bo‘yicha O‘zaro anglashuv memorandumi imzolandi.
Bundan tashqari, "Standard Chartered Bank", "United Green Group", "International Hospitals Group" va "Landers mining" yirik kompaniyalari bilan o‘tkazilgan ikki tomonlama uchrashuvlarda qishloq xo‘jaligi, sog‘liqni saqlash, bank-moliya va boshqa sohalardagi loyihalarni amalga oshirish istiqbollari muhokama qilindi.