O‘zbekiston Respublikasi Investitsiyalar, sanoat va savdo vazirligi

Joriy yilning 14-20 mart kunlari Vazirlik tomonidan Yevropa komissiyasi delegatsiyasining O‘zbekistonga “GSP+” doirasida ikkinchi monitoring missiyasi tashrifi tashkil etildi.

Tashrif maqsadi – monitoring davrida O‘zbekiston tomonidan “GSP+” tizimi doirasida ratifikatsiya qilingan 27 ta xalqaro konvensiyalarning amalga oshirilishi va ikki tomonlama savdo aylanmasini kengaytirish doirasida savdo tartibotlarini uygʻunlashtirish va soddalashtirish yuzasidan kelgusidagi rejalarni muhokama qilish.

Monitoring missiyasi davomida Yevropa komissiyasi tarafidan Investitsiyalar, sanoat va savdo vazirligi, Adliya vazirligi, Bandlik va mehnat munosabatlari vazirligi, Ichki ishlar vazirligi, Ekologiya, atrof-muhitni muhofaza qilish va iqlim o'zgarishi vazirligi,
Bosh prokuratura va O‘zbekiston Respublikasi Oliy Majlisining inson huquqlari bo‘yicha vakili (Ombudsman) hamda bir qator nodavlat notijorat tashkilotlar vakillari bilan uchrashuvlar o‘tkazildi.

O‘tkazilgan uchrashuvlar davomida Yevropa komissiyasi vakillariga xalqaro konvensiyalar talablarini respublika qonunchiligiga tatbiq etish doirasida mamlakatda amalga oshirilgan ishlar va rejalashtirilgan chora-tadbirlar yuzasidan batafsil ma’lumot berildi.

Yevropa vakillari tarafidan O‘zbekiston Respublikasi Davlat rahbari boshchiligida amalga oshirilayotgan islohotlar, jumladan, inson huquqlarini kafolatlashga asoslangan davlat tizimini shakllantirish, tadbirkorlik faoliyatini rag‘batlantirish, iqtisodiy shaffoflikni ta’minlash va turmush darajasini oshirishga qaratilgan keng ko‘lamli tadbirlar mamlakatlar o‘rtasida o‘zaro yaqin hamkorlikni mustahkamlashi e’tirof etildi.

Shuningdek, tashrif yakunida Yevropa Ittifoqining Oʻzbekistondagi elchisi Toivo Klaar “GSP+” benefitsiari maqomi O‘zbekiston va Yevropa Ittifoqi o‘rtasidagi savdo-iqtisodiy aloqalarni yanada diversifikatsiya qilishda asosiy samarali vosita bo‘lib xizmat qilayotganligini ta’kidladi.

Shu bilan birga, muzokaralarda Vazirlik tomonidan “GSP+” doirasidagi imtiyozlardan samarali foydalanish va mahalliy mahsulotlarni Yevropa Ittifoqi talablarga moslashtirish maqsadida savdo tartibotlarini soddalashtirish boʻyicha takliflar ilgari surildi.

Uchrashuv yakunlari bo‘yicha Yevropa komissiyasi vakillari bilan “GSP+” tizimi doirasidagi hamkorlik, savdo tartibotlarini soddalashtirish va xalqaro konvensiyalar talablarini milliy qonunchilikka tatbiq etish boʻyicha kelgusidagi ikki tomonlama chora-tadbirlarni amalga oshirish yuzasidan kelishib olindi.

Ma’lumot uchun: 2021-yil 10-aprel kuni Oʻzbekistonga
“Bosh pereferensiyalar tizimi plyus” (“GSP+”) benefitsiari maqomi berilgan.

“GSP+” tizimi doirasida Yevropa bozoriga 6 200 dan ortiq tovar pozitsiyalarini bojxona bojlarisiz eksport qilish imkoniyati yaratilgan.

Ushbu imkoniyatlardan foydalanish natijasida 2024-yilda Oʻzbekistonda Yevropa Ittifoqi mamlakatlariga mahsulotlar eksporti hajmi 1,4 mlrd dollarga yetib, soʻnggi 4 yil ichida qariyb 3 barobarga oshdi.

“GSP+” tizimi benefitsiar mamlakatlarga bir tomonlama imtiyozlarni taqdim etishdan tashqari, ularga bir qator majburiyatlarni ham yuklaydi.

Unga koʻra, Oʻzbekiston “GSP+” doirasida ratifikatsiya qilingan 27 ta xalqaro konvensiyalar talablarini bajarish majburiyatini olgan.

Yevropa Ittifoqining reglamentiga asosan, Yevropa komissiyasi benefitsiar mamlakat tomonidan mazkur xalqaro konvensiyalar bajarilishi ustidan monitoring nazoratini amalga oshiradi.