Yaqindan hamkorlik qilish: ISSV delegatsiyasi Pragada bir qator tadbirlar o'tkazdi
2025-03-20 09:00:00 / Yangiliklar
Chexiya Respublikasi poytaxti Praga shahrida O‘zbekiston-Chexiya savdo-iqtisodiy va sarmoyaviy hamkorlikni rivojlantirish doirasida qator tadbirlar bo‘lib o‘tdi.
Xususan, O‘zbekiston va Chexiya o‘rtasida savdo-iqtisodiy va ilmiy-texnikaviy hamkorlik bo‘yicha hukumatlararo komissiyaning 10-yig‘ilishi, chex biznes vakillari ishtirokida davra suhbati hamda Chexiyaning yetakchi kompaniyalari rahbarlari bilan qator ikki tomonlama uchrashuvlar bo‘lib o‘tdi. Chexiya Respublikasi sanoat va savdo vazirligi rahbariyati bilan ham muzokaralar olib borildi.
Ikki mamlakat delegatsiyalariga O‘zbekiston Respublikasi Investitsiyalar, sanoat va savdo vaziri o‘rinbosari Akram Aliyev hamda Chexiya Respublikasi sanoat va savdo vaziri o‘rinbosari Martin Frelix rahbarlik qildi.
Savdo-iqtisodiy va ilmiy-texnikaviy hamkorlik boʻyicha hukumatlararo komissiya yigʻilishida tegishli vazirliklar, idoralar va amaldagi kelishuvlar ijrosi uchun masʼul boʻlgan tarmoq birlashmalari rahbarlarining maʼruzalari tinglandi.
Loyihalarning har bir bosqichi atroflicha tahlil qilinib, ularni muvaffaqiyatli amalga oshirishni jadallashtirish bo‘yicha samarali yechimlar ishlab chiqilib, muddatlar hamda mas’ul shaxslar belgilab olindi.
Tomonlar, shuningdek, ikki mamlakat o‘rtasidagi munosabatlarning bugungi holati va ularni rivojlantirish istiqbollarini ko‘rib chiqdilar, o‘zaro savdo ko‘rsatkichlari, sarmoyalarni jalb etish va sanoat kooperatsiyasi bo‘yicha maqsadli mezonlarni belgilab oldilar.
O‘zbekistonda chex kapitali ishtirokidagi 44 ta kompaniya faoliyat yuritmoqda. Oʻzbekiston va Chexiya oʻrtasidagi tovar ayirboshlash hajmi soʻnggi yetti yil ichida olti baravarga oshdi va 2024-yil yakuniga koʻra 434,6 million dollarni tashkil etdi.
Davra suhbatida Chexiyaning S-I Industries, Kompelson, Diamo, Doctor Muller Pharma, Era, Pragoimex, SAZ, Skoda Transportation, Zimatechnik, ZVVZ Engineering kabi 20 dan ortiq yirik kompaniyalari ishtirok etdi. Unda Oʻzbekiston transport, oziq-ovqat, farmatsevtika kabi iqtisodiyot tarmoqlari, turizm, ta’lim va boshqa sohalardagi loyiha takliflari taqdim etildi.
Dastur doirasida tashkil qilingan G2B muzokaralarida tadbirkorlar o‘zaro manfaatli loyihalar hamda savdo shartnomalarini birgalikda amalga oshirish mexanizmlarini muhokama qilishdi.
Tashrif yakunlari bo‘yicha chex kompaniyalari bilan qator kelishuvlarga erishildi, O‘zbekiston-Chexiya hukumatlararo komissiyasi yig‘ilishining bayonnomasi hamda O‘zbekiston Respublikasi Texnik jihatdan tartibga solish agentligi va Chexiya standartlashtirish, metrologiya va sinov idorasi o‘rtasida kelishuv imzolandi.