O‘zbekiston Respublikasi Investitsiyalar, sanoat va savdo vazirligi

Joriy yilning 18-mart kuni O‘zbekiston Respublikasi Investitsiyalar, sanoat va savdo vaziri Laziz Kudratov Vengriyaning "OTP Group" konserni delegatsiyasi bilan uchrashuv o‘tkazdi va guruh tarkibiga kiruvchi kompaniya bilan yirik investitsiya loyihasini amalga oshirish bo‘yicha qator ikki tomonlama hujjatlarni imzolash marosimida ishtirok etdi.

Uchrashuvda O‘zbekiston delegatsiyasiga O‘zbekiston Respublikasi Bosh vazirining o‘rinbosari Jamshid Xodjayev, Vengriya delegatsiyasiga esa OTP Green kompaniyasi bosh direktori Gergey Pokosh boshchilik qildi.

Suhbatda O‘zbekiston-Vengriya hamkorligining dolzarb masalalari, O‘zbekistonda xorijiy investorlar uchun yaratilgan shart-sharoitlar va mamlakatimizda xorijiy biznesni qo‘llab-quvvatlash chora-tadbirlari yuzasidan fikr almashildi.

Ikki davlat oʻrtasidagi hamkorlik izchil rivojlanib borayotgani, bunga keyingi yillarda ishonchga asoslangan oliy darajadagi munosabatlar yordam berayotgani alohida taʼkidlandi. Vengriya biznesi O‘zbekistonga katta ishonch bildirmoqda – O‘zbekiston Respublikasi Prezidenti Sh.M.Mirziyoyevning 2022-yil oktabr oyida Vengriyaga qilgan rasmiy tashrifi yakunlari bo‘yicha 1,3 milliard dollarlik bitim va shartnomalar imzolandi.

Oʻzaro tovar ayirboshlashning asosiy pozitsiyalari toʻqimachilik, oziq-ovqat mahsulotlari, farmatsevtika, mexanik va elektr jihozlari va boshqa tovarlardan iborat.

2024-yil 1-oktabr holatiga ko‘ra, O‘zbekistonda vengriya kapitali ishtirokidagi 12 ta korxona, jumladan, 7 ta qo‘shma va 5 tasi 100 foiz xorijiy kapital ishtirokidagi korxona faoliyat yuritmoqda.

Investitsiya loyihalari portfeliga Vengriyaning OTP guruhi tarkibiga kiruvchi OTP banki tomonidan Ipoteka-bankni xususiylashtirish, Meditop Pharmaceuticals bilan yuqori texnologiyali farmatsevtika korxonasini tashkil etish va boshqa loyihalar kiradi.

Kompaniyaning Sirdaryo viloyatida parrandachilik klasterini tashkil etish bo‘yicha yirik loyihani amalga oshirish borasidagi navbatdagi choralari konstruktiv tarzda muhokama qilindi.

Hamkorlikda amalga oshiriladigan ishlar tafsilotlarini muhokama qilib, tomonlar hujjat almashish marosimiga o‘tdilar. Xususan, Investitsiya bitimi, Sirdaryo viloyatida yer uchastkasini ijaraga berish shartnomasi, O‘zbekiston To‘g‘ridan-to‘g‘ri investisiyalar jamg‘armasi bilan ta’sis va nizom shartnomalari imzolandi.

Ma’lumot uchun: “ZA Invest” kompaniyasi bilan hamkorlikda amalga oshirilayotgan loyiha doirasida klaster hududida 130 gektar maydonda 8 ta parrandachilik fabrikasi, inkubator, so‘yish va qayta ishlash sexlari, ozuqa ishlab chiqarish korxonasi, muzlatkich va ma’muriy binolar quriladi. Loyihaning quvvati yiliga 16 million dona broyler tovuqlari va 120 ming tonna omuxta yem ishlab chiqarishni tashkil etadi.

Loyiha "OTP Green Fund" tomonidan moliyalashtiriladi va "OTP Group" tarkibiga kiruvchi "ZA-Invest Poultry" loyiha kompaniyasi tomonidan amalga oshiriladi.