ISSVda ADQ va "Plenary Group" kompaniyalari bilan uchrashuv bo‘lib o‘tdi
2025-03-14 17:55:00 / Yangiliklar

14-mart kuni O‘zbekiston Respublikasi Investitsiyalar, sanoat va savdo vaziri Laziz Kudratov ADQ kompaniyasining katta ijrochi direktori Roderik Meters va "Plenary Group"ning Yaqin Sharq bo‘yicha bosh ijrochi direktori Mustafo Faxur bilan uchrashdi.
Uchrashuvda tomonlar shu yilning yanvar oyida BAAga oliy darajadagi tashrif davomida erishilgan kelishuvlarni amalga oshirish chora-tadbirlarini muhokama qildilar.
Xususan, davlat-xususiy sheriklik tamoyillari asosida sog‘liqni saqlash, ta’lim, tog‘-kon sanoati, uy-joy va infratuzilma qurilishi, suv ta’minoti tizimlarini boshqarish bo‘yicha loyihalarni amalga oshirish yuzasidan konstruktiv fikr almashildi.
Uchrashuv yakunlari bo‘yicha tomonlar kelishuvlarni to‘liq amalga oshirishga tayyorligini bildirdilar va muhokama qilingan loyihalarni o‘z vaqtida amalga oshirish uchun samarali hamkorlik qilish mexanizmini ishlab chiqdilar.
Plenary Group - 2004 yilda tashkil etilgan Avstraliya kompaniyasi. Aktivlari 35 milliard dollardan oshadi. Kompaniya Shimoliy Amerika, Avstraliya, Buyuk Britaniya va Yaqin Sharqda ishlaydi. 2024 yilda ADQ Plenary Group aktsiyalarining 49 foizini sotib oldi. Kompaniya DBBM (loyihalash, qurish, moliyalash va xizmat ko‘rsatish) tamoyili bo'yicha ijtimoiy va infratuzilmaviy loyihalarga sarmoya kiritadi.








