O‘zbekiston Respublikasi Investitsiyalar, sanoat va savdo vazirligi

Joriy yilning 28-fevral kuni O‘zbekiston Respublikasi Investitsiyalar, sanoat va savdo vaziri Laziz Kudratov Malayziyaning Five Petroleum kompaniyasi ijrochi direktori Lim Chin Fui bilan uchrashdi.

FIVE Petroleum Malaysia 2020-yilda tashkil etilgan. Kompaniya Malayziya bo'ylab 110 dan ortiq yoqilg'i quyish shoxobchalarini boshqaradi. Shuningdek, kompaniya 400 dan ortiq yoqilg‘i quyish shoxobchalarini boshqaradigan BHPetrol’ning 60 foiziga egalik qiladi.

Muzokaralar chog‘ida joriy yilning 4-5-fevral kunlari Malayziyaga oliy darajadagi tashrif chog‘ida erishilgan kelishuvlarni amalga oshirish, shuningdek, yangi istiqbolli yo‘nalishlar, jumladan, energetika va tog‘-kon sanoatida loyihalarni hayotga tatbiq qilish masalalari muhokama qilindi.

FIVE Petroleum Corporation tajribasi va sarmoyalarining O‘zbekistonga olib kelinishi mazkur yo‘nalishlarda amalga oshirilayotgan ishlar sifatini sezilarli darajada oshirishi hamda Malayziya va umuman, xorijiy investorlar uchun yana bir muvaffaqiyatli pretsedent yaratishiga o‘zaro ishonch bildirildi.

Kompaniya rahbariyati mamlakatimizda biznes yuritish uchun yaratilgan shart-sharoitlarni yuqori baholab, har ikki tomon uchun ham manfaatli bo‘lgan yangi loyihalar ustida hamkorlikda kelgusida ish olib borishdan manfaatdorligini bildirdi.

Muzokaralar natijasida muhokama qilingan loyiha va tashabbuslarni muvaffaqiyatli amalga oshirish doirasida kelgusida hamkorlik qilish mexanizmlari ishlab chiqildi.