O‘zbekiston Respublikasi Investitsiyalar, sanoat va savdo vazirligi

Joriy yilning 17-21 fevral kunlari O‘zbekiston Respublikasi Investitsiyalar, sanoat va savdo vazirligi delegatsiyasi Dubay (BAA) shahrida bo‘lib o‘tgan “Gulfood 2025” yirik xalqaro oziq-ovqat va ichimliklar ko‘rgazmasida ishtirok etdi.

“Made in Uzbekistan” stendida O‘zbekistonning oziq-ovqat sanoati va agrosanoat kompleksidagi 40 dan ortiq yetakchi kompaniyalari o‘z mahsulotlarini namoyish etdi. Eksport mahsulotlarining keng assortimenti: yangi meva-sabzavotlar, quritilgan mevalar, yong‘oqlar, dukkaklilar, tabiiy sharbatlar, mineral suvlar va boshqa ekologik toza mahsulotlar namoyish etilgan stend importyorlar, distribyutor va chakana savdo korxonalari e’tiborini o‘ziga tortdi.

Koʻrgazmada BAA, Saudiya Arabistoni va boshqa Fors koʻrfazi davlatlarining 20 dan ortiq yetakchi chakana savdo kompaniyalari, distribyutorlari va savdo agentlari, jumladan Al Maya Group, Lulu, Carrefour BAA, Carrefour Saudi, Choithrams, Grandiose Hypermarkets, Americana Foods, Family Brands, SafarakPlus, L.S., L.S ff, Kainro World, Kamal Luthra General Trading MChJ, Al-Tayeb kompaniyalari qatnashdi.

Shu bilan birga, “Lulu” va “Al Maya Retail” savdo tizimlari rahbariyati bilan o‘zbek mahsulotlari sotiladigan “Made in Uzbekistan” savdo rastalarini tashkil etish bo‘yicha kelishuvga erishildi.

Ko‘rgazmaning dasturi doirasida O‘zbekiston Investitsiyalar, sanoat va savdo vazirligi Tashqi savdo departamenti boshlig‘i Inomjon Abdurahmonov boshchiligidagi delegatsiya Yaqin Sharqdagi eng yirik EIZlar – KEZAD Group, Fujayra va Dubay integratsiyalashgan iqtisodiy zonalari rahbariyati bilan muzokaralar olib bordi.

O‘zbekiston mahsulotlarini qayta ishlash hamda Yaqin Sharq va Afrika mamlakatlariga eksport qilish uchun distribyutorlik markazini ochish, biznes-inkubatorlarni tashkil qilish, saralash va saqlash quvvatlaridan foydalanish masalalari muhokama qilindi.

Muzokaralar yakunida Yaqin Sharqdagi eng yirik NOON elektron tijorat platformasi bilan Oʻzbekiston tovarlarini joylashtirish, bond omborlaridan foydalanish, STM (oʻz savdo belgisi) asosida yetkazib berishni yoʻlga qoʻyish hamda B2B va B2C tarzida eksportga yetkazib berishni tashkil etish boʻyicha kelishuvga erishildi.