O‘zbekiston Respublikasi Investitsiyalar, sanoat va savdo vazirligi

21-fevral kuni O‘zbekiston Respublikasi Investitsiyalar, sanoat va savdo vaziri Laziz Kudratov Ispaniya Qirolligining qarorgohi Moskva shahrida joylashgan O‘zbekistondagi Favqulodda va Muxtor Elchisi Rikardo Martines Vaskes bilan uchrashuv o‘tkazdi.

Tomonlar asosiy e’tiborni O‘zbekiston-Ispaniya hamkorligining dolzarb masalalariga, shuningdek, 2025-yilda qo‘shma tadbirlar o‘tkazishning tashkiliy jihatlariga qaratdilar.

Ikki tomonlama savdo-iqtisodiy va sarmoyaviy hamkorlikka oid keng ko‘lamli masalalar ko‘rib chiqildi. O‘zaro tovar ayirboshlash tarkibi va hajmini tahlil qilib, tomonlar barcha mavjud imkoniyatlardan, jumladan, GSP+ imtiyozlar tizimi doirasida bojsiz savdo rejimidan foydalanish, biznes missiyalarini tashkil etish, umuman olganda, savdo jarayonlariga har ikki davlatning yuqori talabga ega bo‘lgan mahsulotlarni ishlab chiqaruvchilarini keng jalb etish zarurligi to‘g‘risida yakdil fikrga kelishdi.

Investitsiyaviy hamkorlik ko‘lami ham izchil oshib borayotganligi ta’kidlandi – O‘zbekistonda ispan kapitali ishtirokidagi 16 korxona muvaffaqiyatli faoliyat yuritmoqda.

Suhbatda ta'kidlanganidek, qo'shma loyihalar va savdo shartnomalarini amalga oshirish uchun Ispaniya korxonalarini xalqarolashtirish jamg'armasining (Fondo para la Internacionalización de la Empresa) moliyaviy va texnik yordamini jalb qilish istiqbollari sarmoyaviy sheriklik va sanoat kooperatsiyasini rivojlantirish sohasida katta imkoniyatlar ochmoqda.

Shu nuqtai nazardan, yashil energetika, transport va logistika, suv va qishloq xo‘jaligi, konchilik va metallurgiya kabi sohalarda yangi loyihalarni amalga oshirish chora-tadbirlari muhokama qilindi.

Uchrashuv yakunida tomonlar oʻzaro munosabatlarning barcha muhokama qilingan yoʻnalishlari boʻyicha hamkorlikni yanada chuqurlashtirish va kengaytirishga sobit qolishlarini bildirildi.