O‘zbekiston Respublikasi Investitsiyalar, sanoat va savdo vazirligi

Joriy yilning 10-fevral kuni O‘zbekiston Respublikasi Investitsiyalar, sanoat va savdo vaziri Laziz Kudratov va Qozog‘iston Respublikasining O‘zbekiston Respublikasidagi Favqulodda va Muxtor Elchisi Beybut Atamqulov, tashqi ishlar vaziri o‘rinbosari Alibek Kuantyrov hamda savdo va integratsiya vaziri o‘rinbosari Kayrat Torebayev o‘rtasida uchrashuv bo‘lib o‘tdi.

Suhbat chog‘ida mamlakatlar o‘rtasidagi iqtisodiy aloqalarni mustahkamlash, tovar ayirboshlash hajmini ko‘paytirish va sanoat kooperatsiyasini rivojlantirishga qaratilgan ikki tomonlama hamkorlikning asosiy masalalari muhokama qilindi.

Tomonlar konstruktiv fikr almashib, yaqin istiqboldagi aniq vazifalarni belgilab oldi. Xususan, oʻzaro savdoda cheklovlarni bekor qilish, qishloq xoʻjaligi mahsulotlarini yetkazib berish uchun kvotalar ajratish, tovarlarning kelib chiqishini sertifikatlashning elektron tizimlaridan foydalanish, nazorat-oʻtkazish punktlarini modernizatsiya qilish borasida kelishib olindi.

“Markaziy Osiyo” sanoat kooperatsiyasi xalqaro markazi” faoliyatini yanada rivojlantirish imkoniyatlari va tovar ayirboshlash hajmini 10 milliard dollarga yetkazish dasturini muvofiqlashtirish jarayoni alohida ko‘rib chiqildi.

Uchrashuv yakunlari bo‘yicha tomonlar muhokama qilingan masalalarni qisqa muddatlarda amaliyotga tatbiq etish tayyorligini bildirdilar hamda aniq muddatlar va mas’ul shaxslarni belgilab oldilar.